Vuursjtèè

Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.

---

Vuursjtèèbaanke in 't kriet.

Vuursjtèè of silex is 'ne glaasechtige, mae helle sjtèè dae zich in holtes, m.n. in gegrave geng van zieëkreefte, in 't kriet gevörmd haat in 'n proces dat verkiezeling genumd wert. 't Kiezelzuur dat aafgesjèjje wert bie 't vergoeë van de weke dele van zieëiegele makde die verkiezeling mäögelek.

Es gèng erosie haat plaatsjgevonge vindt me silex in de vörm va knolle in 't kriet truuk in horizontaal baanke, zoewie in de ENCI-groeve of in de vertikaal mergelwande langs 't Albertkanaal. Mètstens is 't ömringende kriet evvel in d'r loop van d'r tied opgelost en voetgesjpeuld en bleef d'r silex achter. De kleur kan variëre va gael, broen, gries, broengriezig, wie d'r vuursjtèè va Rule of zelfs zjwart.

Bekènde Limburgse geoloog

M.W. Felder is 'ne Limburgse geoloog en 'ne internationaal erkaande expert op 't terrein va vuursjtèè.

Prehistorie

In d'r sjtèèntied waoërt va silex getuug gemakd. In d'r owwe sjtèèntied hoof me mèt 'ne klopsjtèè 't övvertollige aaf van d'r kern, dae 't werktuug waoërt, zoewie 't voesbiel. In d'r jongere sjteentied hoof me mèt 'ne klopsjtèè of 'n sjtuk hertehaoën de klinge, dit zeunt fieng sjtökskes sjerpe vuursjtèè, aaf van d'r kern en makde daomèt 't getuug, zoewie sjpeerpeunte, pielpeunte, dolkpeunte of metspeunte.

Oontginning va vuursjtèè

Vuursjtèè waoërt mètstens bie daagboew oontgonne. Langs baeëke en in hellinge loge ze vör 't oprape. In Riekelt vindt me evvel 'n vuursjtèèmien, de aodste mien va Nederland.

• 
  Dolkpeunt in haandvat oet d'r nuje sjteentied.
• 
  Voesbiel oet 't paleolithicum.
• 
  Klènger silexknolle.
• 
  Vuursjtèèknol.
• 
  Vuursjtèèkern mèt aafgehowwe klinge.

Externe link

• Flintsource.net Vuursjtèè oe gaans Europa