Ukkel

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

Liegking van Ukkel in 't Brussels Hoofsjtaejelik Gewes

Ukkel (Frans: Uccle) ies 'n gemeinte in 't Brussels Hoofsjtaejelik Gewes. De gemeinte liek ten zuje van Brussel-centrum. Ze haet 'n oppervlak van 22,91 km², 't aantal inweunersj ies 75.169 (1 juli 2005). Ukkel ies nao Brussel de groatste gemeinte in oppervlakte van 't gewes, nao aantal inweunersj sjteit 't op de veerde plaats.

Functies

Ukkel ies veural 'n woongemeinte, mèt hoofzakelik residentieel wieke. De landboew waor vreuger e belangriek besjtaonsmieddel, meh tegewoordig ies de deenstesector 't belangrieks. Dao ies ouch get industrie, woa-ónder electronica. In Ukkel zint 't Koninklijk Meteorologisch Instituut (KMI) mèt de keuninklike sjterrewach van Belsj en 't Belgisch Instituut voor Ruimte-Aëronomie (BIRA) gevestig.

Aanziech van de gemeinte en bezeenswaerdighede

Russisch-orthodoxe kèrk in Sint-Job

'n Deil van 't Zoniënwoud liek op 't gróndgebeed van Ukkel. Dao zint väöl villawieke, en ouch e paar buurte mèt e miè volks karakter, wie Sint-Job en Calevoet. De Sint-Pieterskèrk ies geboewd in classicistische sjtiel. De kapel van Onze-Lieve-Vrouw-ter-Nood van Stalle ies gotisch. D'n arsjitek Henry Van de Velde boewde in Ukkel veur ziechzelf de Villa Bloemenwerf. In Sint-Job liek 'n Russisch-orthodoxe kèrk. In 't Wolvendaalpark (18 ha) liek 'n paviljoen in Lowie XV-sjtiel.

Historie

De gemeinte Ukkel óntsjtóng in 1795, wie Ukkel mèt de liènrechte Carloo en Stalle woort samegevoog. Rónd 1900 waor 't groatste deil van Ukkel nog landelik en Nederlandstalig. Wie Ukkel ummer miè 'n ónderdeil woort van de agglomeratie Brussel greujde de bevolking explosief en verfransde de plaats.

Gebore in Ukkel

• Olivier Strebelle (1927), beeldhouwer
• Geert van Istendael (1947), sjriever
• Axel Merckx (1972), fietsrenner
• Mathilde d'Udekem d'Acoz (1973), prinses van Belsj

Externe link

• Officieel site van de gemeinte