Veldeke-orgaan

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

't Veldeke-orgaan ies 't tiedsjrif van de dialekvereiniging Veldeke. 't Weurt ouch waal gewoon Veldeke geneump, nao de naam van de vereiniging, die häöre naam te danke haet aan Henric van Veldeke. Bie de opriechting van de vereiniging in 1926 woort ouch ’t Veldeke-orgaan gelanceerd.

Inhoud

De inhoud besjteit oet:

• verhaole en gediechte (in 't dialek) van Veldeke-lede oet gans Nederlands Limburg en Belsj Limburg
• artikele euver cultureel ónderwerpe: literatuur, theater, volkscultuur, film, muziek, tv-programma's in relatie tot de sjtreektaal en de Limburgse cultuur
• besjrieving en recensies van nuuj dialekbeuk en dialekcd's en/of van Limburgse auteursj
• interviews mèt bekènde Limburgersj
• mètdeilinge van 't Hoofbesjtuur en diverse versjlage van oet de (12) Veldeke-kringe

Sjtreektaal

Bekans alles sjteit in ’t dialek gesjreve. Ónder eder artikel sjteit in wélk van de Limburgse dialekte.
't Blaad ies ’n platform veur de beginnende en gevorderde dialeksjriever in Limburg. Literatuur op zien Limburgs weurt publiceerbaar en zoa ziechbaar veur edere belangsjtèllende lezer. Behalve veur de Limburgse cultuur ies d’r veural aandach veur taalkundige aspecte van de dialekte en ’t maatsjappelik draagvlak. Die belangsjtèlling uut ziech in dialectologische, volkskundige en cultuurhistorische artikele en besjouwinge euver de positie van Limburg en zien sjtreektaal (de Limburgse dialekte). ’t Blaad versjient 6 kièr per jaor in A5-formaat. Vanaaf de jaore 90 in A4 mèt ’n kaf in kleur, geseerd mèt 'n kunswerk.

Bloomlezinge

Van oet 't Veldeke-orgaan zint 'n paar bloomlezinge geselecteerd:

• In 1975 Mosalect
• In 2000 Mozaiëk

JMV

In 2006 versjient 't ièrsjte, speciaal veur de jeug gesjreve jaormagazine in A4-formaat (gans in kleuredrök): 't Jeugdmagazine Veldeke