Reptiele

Reptiele of Kroepers zien 'n klasse vaan de gewèrvelde diere. Ze zien in 't Paleozoïcum oontstoon en waore in 't Mesozoïcum hiel dominant aonwezig; paleontologe spreke daorum wel vaan 't "Epok vaan de Reptiele". De reptiele höbbe 'ne leirachtege hoed en kroepe meistens euver de groond (slange höbbe häör pu zelfs gaans verlore). De allewijl levende reptiele zien alle kaajdbleujeg; wermbleujege reptiele, wie de Pteranodon, zien inkel es fossiel bekind. De veugele en de zoegdiere mote bei oet de reptiele geëvolueerd zien.

De reptiele weure in zes ordes oonderverdeild; de groetste ouch nog in drei dudelik vaanein versjèllende oonderordes, en wel op dees meneer:

• Krokodille (Crocodilia)
• Brögkhagedisse (Rhynchocephalia)
• Squamata
  • Herdisse (Sauria)
  • Wörmherdisse (Amphisbaenia)
  • Slange (Serpentes)
• Sjèldpadde (Testudines)
• Saurischia
• Ornithischia

De Saurischia en de Ornithischia vörme same de Dinosaurusse (Dinosauria).