Norbiks

Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.

---

't Norbiks is 't Limburgs dialect gesproke in Norbik.

Kènmaerke

Ripuarismes

Wie alle dialekte in 't Mergellland ligk 't Norbiks in de euvergangszaone van 't Limburgs nao 't Ripuarisch, en ooch al is 't aontal ripuarismes beperkt, toch valle dudelik de volgende vas te stèlle:

• Norbik is èè van de westelikste dörper oeë 't lidwoord d'r veur mannelèke wäörd väörkump. Te weste vaan Norbik is dat de of d'n.
• Norbik liegkt zjuus t'n ooste van de isoglos tösje bein en boum einerzijs en been en boom anderzijs. In Norbik kleenke die lètste twie vörme. Dees lijn löpt va Norbik deur bies aon De Boesj (Koningsbosch).

Neet-ripuarismes

Norbik liegkt evvel wer zjuus t'n wèste van de -lik/-lich-lijn; me zaet hie natuurlèk, neet natuurlèch. In Sjlennich, e dörp wiejer nao 't ooste, is dat waal te hure (dit is ooch in d'r naam te zieë).

Aander kènmaerke

• Andersj es in de mètste Limburgse dialekte blijf de -t in alle gevalle stoon (m.a.w. gein t-deletie). Ouch opvallend zien de väöl verkortinge van oorsprunkelèk lang vocale (Noorbeek > Norbik). Dao stjèèt taegenuvver dat de i veur 'n n verlengkt wert tot ee: keend, seent.
• Mieërvoudsvörming mèt behulp van d'r umlaut: bv. boom-beum; baank-baenk.
• Mieërvoudsvörming mèt behulp van verendering in toeën: bv. been-been; daag-daag.
• Toeënverendering haat betekenisoondersjèjjende waeërd: bv. haos-haos; knèè-knèè

Historie

D'r is nog neet väöl uvver 't dialekt va Norbik gesjraeve mae 'n umvangrieke sjtudie oet de jaore daartèg bevestègt de waarnumming dat de taal groeëte verenderinge haat dörgemakd. In de daartèger jaore zag me bv. loojt ipv loch; aajt ipv ach; zaajt ipv zach.

Norbiks op sjrif

'n Bekaande sjriefster is Bep Mergelsberg, die oonder andere in 't blad Veldeke publiceerde, wie dat nog besjtong.

Externe link

• Vastelaovendleedsjes oet Norbik