Harlingen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan Harlingen in Friesland

Harlingen (Fries Harns) is 'n stad en gemeinte in de Nederlandse provincie Friesland, mèt op 1 november 2006 15.417 inwoeners en 'n oppervlak vaan 387,67 km² (daovaan 't groetste deil, 362,49 km², water of wad). Neve de hoofplaots Harlingen umvat de gemeinte nog de dörper Midlum (Mullum) en Wijnaldum (Winaem). De Nederlandse naome zien officieel.

Historie

De historie vaan Harlingen es nederzètting weurt veuraofgegange door 't dörp Almenum. Dit dörp waor in 777 de plaots boe de ierste christelike kèrk in Friesland gestiech woort. In 1157 kaom hei ouch 't kloester Ludingakerke, wat al gaw ei vaan de riekste kloesters vaan Friesland woort. In deen tied waor 'n naobersjap te weste vaan Almenum sterk opgekómme; dit waor Harlingen, wat in 1234 stadsrechte kraog. Almenum laog sins 'n stadsoetbreiing in 1579 binne de walmör vaan Harlingen. Noordwestelik vaan Harlingen laog bovedeen ouch de stad Griend, allewijl e klei zandpleetsje in de Waddezie.

De stad Harlingen had veural belaank es centrum vaan de vèsserij, in 't bezoonder de walvèsvaort. In 1579 oonderteikende 't de Unie vaan Utrei. Iewelaank blaof Harlingen 'n klein stad oonder de rouk vaan 't veurnaomer Franeker mèt zien universiteit.

Op 1 januari 1984 woorte de dörper Midlum en Wijnaldum oet de daan opgeheve gemeinte Barradeel bij Harlingen geveug.

Externe link

• Website vaan de gemeinte