Sjin op Geul

Dit artikel is gesjreve (of begós) in 't Sjins. Laes hie wie v'r mit de versjillende saorte Limburgs ómgaon.

---

Sjin en de kèrk 2005

Sjin op Geul  loester (Nederlands: Schin op Geul) is 'n dörp in de gemeinte Valkeberg aan de Geul. Ouch de buurtsjappe Ingwege, Keuteberg, Walem, Sjoanbrón, Opsjuèmer en Sjtröch huère bie Sjin. 't Grondgebeed va Sjin is 691 hectaar groat en d'r wone ongevaer 2000 luuj. 't Dörp is bekènd es vakantieplaats. D'r ligke dan ouch ein paar hotels, campings en e bungalowpark. Tot 1940 waor Sjin 'n zelfsjtendige gemeinte.

De ièrsjte gesjreve vermelding van 't dörp Sjin dateert oet 1145. In 'ne gunsbreef besjrif Paus Eugenius d'n derde de bezittinge van de monnike va Reims. In dae breef weurt ouch de kèrk va Sjin geneump.

Naam

Me haet versjillende verklaoringe veur de naam Sjin. De naam zou kènne kómme van 't keltisch woord schin dat plaats beteikent. Volges dees verklaoring zou 't dörp óntsjtange zin bie 'n doorwaadbaar plaats in de Geul.
De ander verklaoring is dat de naam is aafgeleid van e volk, de Suniciërs. Zie vestigde zich naodat de Eburone door de Romeine waore oetgeroeid in 't gebied dat noe Zuid-Limburg is. Ouch va ander plaatse in de buurt liekent de naam te kómme van deze sjtam, namelik Sjènne, Sjilvend, Sinnich en Sjömmert.

Dialek

't Dialek va Sjin liekent väöl op dat va Valkeberg (boete de paort). Westelik va Sjin löp 'n isoglos, 'n taalgrens, die aangeuf dat bepaalde klanke en weurd in Sjin angesj (oasteliker) zin es in bv. Valkeberg.

Kèrk

De parochiekèrk va Sjin is gewiejd aan d'r heilige Mauritius. 't Oudste deil van de kèrk is geboewd in romaanse sjtiel. In 1926 boewde me ónder arsjitek Van Groenendael oet Mestreech 'n nuuj groat middesjeep mèt twiè ziebeuke, e nuuj preesterkoar en twiè sacristieë. De kèrk is saer 1859 e baevaartsoord van d'r heilige Cornelius, umdat d'r hie relieke va häöm waere bewaard. Wiejer sjteit in de kèrk e gepolychromeerd gipse beeld van d'r heilige. In Sjin verièrt me Cornelius veural es petroan tege de nervekrenkdes. Saer 1873 hèlt me eder jaor in september, rónd d'r fièsdaag va Cornelius, 'n octaaf. Me kènt in Sjin ouch allerlei Cornelius-devotionalia gelle.
Bie de parochie va Sjin huèrt ouch De Kloes op d'r Sjaasberg. Op de lètste zóndig va juni vingk d'r Sjaasbergergank plaats en dreug d'r pesjtoar va Sjin 'n Mès op in de kapel van de Kloes.

Trein

Sjin op Geul lik aan d'r sjpoorlien Mestreech - Heële en haet 'n eige sjtasie. De sjtasie lik ouch aan 't miljoenelientje (Kirchroa (Centrum) - Sjin). 't Trajek haet dae naam gekrege umdat 't in 1911 ein miljoan gölle per kilomaeter kosde um 't aan te lègke. Saer april 1995 riejt d'r eine sjtoumtrein op dit trajek. D'r sjtoumtrein weurt beheerd door de Zuid-Limburgse Sjtoumtrein Maatsjappie (ZLSM).

Dörpsvereiniginge

• Fanfare Sint Cornelius
• Dameskoar Vivace
• Zanggezelsjap Inter Nos
• Sjötterie Sint Mauritius
• Heemkundevereiniging Sjin op Geul
• Carnavalsvereiniging de Waterratte
• Voetbalclub Sjtruchter Boys

Extern links

• Heemkundevereiniging van Sjin op Geul
• Sjin op Geul es baevaartsoord (Meertens Instituut)