Piet Bours

Piet Bours aan 't örgel in de Nuuj Kèrk in Valkeberg.

Piet Bours (Valkeberg, 6 november 1945) ies eine Valkebergse musicus.

Biografie

Piet woort op 6 november 1945, nét nao ziene ziene twièlingbroor Lei, gebore és 5e kind oet 'n gezin van 6 kinger és zoon van Harie Bours en Anneke Donners. Hae ies opgegreujd op de Heunsberg (nummer 6), wao zien mam oeteindelijk ruim 70 jaor haet gewoond. Es kleine jong waor Piet al häös neet weg te kriege bie de piano. Vanaaf zien 7e jaor kreeg hae pianolès van Gustaaf Hertogs (later van Guus Bosch en Yvonne Cozijnsen) en hae kreeg later ouch örgel-lès bie Jo Wiché. Vanaaf zien 14e jaor waor hae al wekelijks actief in de kèrk és begeleider aan 't örgel.

Nao de middelbare sjoal ging Piet nao 't conservatorium in Mestreech en in 1966 volgde ein aansjtèlling és docent piano aan de Valkebergse muzieksjoal, wao hae bienao 40 jaor aan verbonge bleef (de lètste jaore ouch op väöl ander locaties en onder de naam "Kumulus").

Piet haet diverse luuj en koare begeleid aan de piano of 't örgel en versjillende koare geleid és dirigent. Dat deit hae tot op hede nog sjteeds in de regio's Mestreech en Valkeberg. In 't verleeje waor hae dirigent-örganis van ’t St. Caeciliakaor van de Nicolaasparochie (1968-1992), van 't Gregoriuskoar van de Slevevrouweparochie (1992-2001) en van 't rouw- en trouwkoar (t/m 2001). Hae ies jaorelangk vaste pianobegeleider gewaes van Wiel Odekerken bie Zangvereiniging Eindrach oet Sub en Mannekoar Geuklank oet Valkeberg. Bie 't lètst geneumde koar kreeg hae veur zien jaorelange betrokkeheid op 19 november 2011 't beeldsje "de Geulklanker". Tussje 1982 en 1985 houw Piet de leiding van 't toenmalige 'Klokkekoar' in Valkeberg, 'n hoagtepunt hie waor de oetveuring van Hoffmanns Erzählungen van J. Offenbach in de Nuuj Kèrk in Valkeberg.

Saer 1977 al ies Piet dirigent van Zangvereiniging Orphée oet Houtem (Valkeberg).

Werk

Veur zangvereiniging Orphée maakde hae 'n groat aantal arrangemente van zangpartiture: O.a. Daba daba da; Hoera; Lang willen we leven; Singin (inzingoefeninge); Süsser die Glocken nie klingen; Hirtenlied van Kurth Dietrich en de veersjtummige bewèrking van 't Limburgs volksleed in 't Limburgs (op de Valkebergse teks van Els Diederen 1996).

Hae componeerde o.a. de muziek van:

• Ode aan Houthem St-Gerlach mèt 'n teks van Jan Notten
• Geul mèt 'n teks van Anne-Marie Bemelmans-Steynebrugh
• Ode aan Houtem op de teks van Sjir Frissen

Trivia

• Onder 'n pseudoniem haet Piet in 2014 de melodie van 'nne karnevalssjlager gecomponeerd.