Sjeng

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Sjeng is 'ne jóngesnaom dee veural in Nederlands Limbörg veurkump. De naom is aofgeleid van Johannes.

'ne (manneleke) Mestreechteneer weurt ouch wèl Sjeng geneump, zoewel door ziechzelvers es door Limburgers vaan boete Mestreech. Soms weurt ouch 't Mestreechs dialek Sjengs geneump. Sjeng weurt boete Mestreech ouch gebruuk es e sjeldwoord veur 'ne Mestreechteneer. 't Antoniem is boer, wat Mestreechtenere dèks gebruke es sjelnaom veur alle Limbörgers vaan boete Mestreech.

De vörm Sjeng is via 't Frans Jean in 't Limbörgs gekoume. Jean weurt in Limbörgse moond Sjang; 't verkleinwoord vaan Sjang is Sjengske. Es Sjengske groet weurt nump me häöm soms neet Sjang mèr Sjeng.

Vreuger numde ze boete Mestreech 'ne Mestreechteneer 'ne Pier. In en roond Kèrkraoj gebruuk me dit woord nog ummertouw. Allewijl is 't nog gebruuk in voetballeedsjes vaan Roda JC boe me in zingk tot Roda noets maag goon fusere mèt MVV: Nooit FC Limburg. Fortuna onderaan, nooit met die Pieren samen gaan.

Bekinde Sjenge

• Sjeng de Belsj (echte naom Jean Paulussen), Belzje zenger (gebore in Veldtwezelt-Lanaken) dee leedjes in 't Mestreechs zingk, bekind vaan "Es iech in dien auge kiek", "De polonaise trein" en "De leefs mer eine kier".
• Sjeng Kraft, pa vaan Beppie Kraft, accordeonis en sjriever vaan vastelaovendsleedsjes
• Sjeng Kremers, tösje 1977 en 1990 Gouverneur vaan Limburg;
• Sjeng Meijs, Valkebergsen diechter;
• Sjeng Schalken, bekinde tennisser oet Weert;
• Sjeng Scheffers, waor veur 'nen tied de woordveurder vaan 't Mestreechse woenwagekamp Vinkenslag.
• Sjeng Tans, politicus en opriechter vaan de Universiteit Mestreech

Boe 'Sjeng' nog mie weurt gebruuk

• "Sjeng aon de geng", e leedje vaan Frans Theunisz, zenger vaan de "Nachraove". 't Nummer weurt veural mèt de karnaval gedrejd en kraog zèlfs landeleke bekindheid in 1995.
• Sjeng & the Gang, a bandje oet 't pläötske Rogkel.