Lemieësj

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

Lemieësj (Nederlands: Lemiers) ies 'n dörp in de gemeinte Vaols in 't heuvelland van Zuud-Limburg. Ouwer name zint: Lumirs, Lomers en Lymier. In de Selzer- of Sinzelbeek (ouch waal Senserbach) monde hie vief beke oet: Zieversbeek, Klaasvelderbeek, Hermansbeek, Harleserbeek, Orsbacher Pütz.

Kerne

't Dörp besjteit oet 3 deile:

• Oud Lemieësj, dit ies de ouw dörpskern, die op Nederlands gróndgebied liek tege de Duutsje grens
• Nuuj Lemieësj, aan en rónd de rieksweeg van Vaols nao Mestreech
• 't Duutsj Lemieësj, behuèrend bie de sjtad Aoke. Hie bevingk ziech de Lemiersjer watermeule. 'n Brökske euver de Senser(grens)beek verbingk Nederland mèt Duutsjland.

't Nederlands gedeilte haet 800 inweunersj.

Gesjiedenis

In 't oud gedeilte ies in 1929 moerwerk bloatgelag van 'ne Romeinse villa mèt badhoes. Dae zou sjtamme oet de 2e ièw. De naam Lemiers weurt geneump in 1041 inzake 'n sjinking van 'n good Lumirs door Keuning Hendrik III aan 'n zekere Irmingard. In 1202 ies sjpraoke van Hière van Lumirs en in dao-op volgende ièwe van Hière van Lemiers. Zie zetelde in Gen Hoes, Kesjtièl Lemieësj. Tot 't ing van de 18e ièw waor Lemiers 'n hièrlikheid en tot 1937 huèrden 't bie de parochie Viele. In 1937 woort de in 1896 geboewde rectoraatskèrk de parochiekèrk.

't Dörp

In de ouw kern bevinge ziech versjillende bezeenswaerdig geboewe. De Katharinakapel ies 'n Romaans zaalkèrkske mèt expressionistische moersjilderinge, die in 1978 gemaak zin door Hans Truijen. 't Kèrkske ies geboewd van zand- en breuksjtein. Vlak in de buurt sjteit 'ne grenssjtein mèt 'ne adelaer, 't waope van Aoke, d'r op.

Taeves liek hie 't mèt grachte umgeve Gen Hoes of kesjtièl Lemieësj, dat in de 17e ièw herboewd ies op de fundamente van 'ne mieddelièws adellik hoes. In de nuuj kern, op de krusing mèt de rieksweeg, sjteit de veurmalige rectoraatskèrk van de heilige Catharina en Lucia oet 1896.

Dörpsvereiniginge

• Harmonie Sint Catharina
• Zangkoar CCK

Gebore in Lemieësj

• Ronald Waterreus, vootbalkeeper