Heuvelland Aktueel

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

Heuvelland Aktueel ies ein van de regionaal (en graties) weekgezètter, die versjiene in Zuud Limburg.
Heuvelland Aktueel weurt bezörg bie de inweunersj van 't gans heuvelland, van Hölsberg - Valkeberg tot Vaols. De ander regionaal blaar zin: De Maaspost (in Mestreech en Meersje en umgeving); 't Zondagsnieuws (in 't heuvelland, Zitterd-Gelaen en Brunssum), De Trompetter (in 't heuvelland en Zitterd), de Maas en Mijn in Zitterd, de Maas- en Geleenbode in Gelaen en Baek, de Geulbode (in Meersje, Gäöl, Raotem, Bung, Moorveld, Ulesjtraote en Borghare en saer 2007 de Weekendgazet. De ièrsjte 4 were oetgegeve door de Nederlandse weekbladengroep (NWG).
Hun specialiteit (neve reclame) ies regionaal nuujs en beriechte. Heuvelland Aktueel kump oet saer 1990. In Valkeberg ies 't de opvolger van 't (ouch graties) weekblaad Het Land van Valkenburg, bie de luuj bekènd es t Gezètsje, dat tièntalle jaore versjpreid woort in de toen zoa heisjende gemeinte Valkeberg-Houtem.

Saer januari 2010, en nao bekans 20 jaor onder dae naam, geit Heuvelland Aktueel same mèt 't weekblaad De Trompetter, onder de nuje naam De Trompetter/Heuvelland Aktueel. Ze höbbe same wekeliks 60 edities.

Gemeinteberiechte

In Heuvelland Aktueel publicere de gemeintes Valkeberg aan de Geul, Gulpe-Wittem en Mergraote hun officieel gemeinteberiechte.
Tot 2009 zint ouch de programmeringe van de Mèsvieringe in de kèrke van de regio d'r in nao te sjloon. Daoneve sjteit t'r 'ne cultuuragenda in.

't Maske

Heuveland Aktueel geuf, sjuus wie vreuger t Gezètsje, eder jaor 'n carnavalsgezèt oet in Valkeberg mèt de naam 't Maske. Dit blaad sjteit gans in 't Valkebergs (en in alle dialekte in de gemeinte). De mètdeilinge, artikele en beriechte zin carnavalistisch. 't Maske haet 'n eige redactie.