Voetbal

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Voetbal (ouch sjotte) is de meis gespäölde en meis bekeke sport op Eerd. 't Is 'n teamsport, boebij twie ploge vaan tien veldspeulers en eine keeper op e veld (gewoenlek 50 bij 100 meter) tegenein speule. De bedoeling vaan 't speul is 'ne bal zoonder aonraking mèt de han in 't door de ander ploog verdedeg doel te kriege; de keeper evels maag, binne zeker grenze, veur de bal oet zie doel te hawwe, de bal vasnumme.

Voetbal is es speul prehistorisch, meh is in zienen huidege vörm midde negentiende iew in Ingeland geïnstitutionaliseerd.

Competities

De meiste len höbbe versjeie nationaal compitities boe-in clubs voetballe, gerangsjik nao niveau. De Nederlandse competities valle oeterein in die vaan 't profvoetbal (Ieredevisie en Ierste Devisie) en die vaan 't amateurvoetbal. De beste amateurclubs benadere 't niveau vaan sommege clubs in 't betaold vootbal. Neve dees competities kint Nederland ouch 'ne bekerwedstrijd, de Gatorade Cup, boe-aon zoewel profclubs es gooj amateurclubs mètdoen.

Op internationaal niveau weurt ouch wel in clubverband gespäöld, namelek tösse kampioene en hoeg geclasseerde clubs oet versjèllende len oonderein, meh de meiste belangstèlling geit gemeinlik oet nao 't vootbal in landeteams. De Nederlandse en Bèlsje teams kómme geregeld oet in 't Europees Voetbalkampioensjap en 't Wereldvoetbalkampioensjap. Regerend Europees Kampioen is op dit momint (2008) Spanje, wereldkampioen is (2006) Italië.

Clubs

De op clubniveau 't bes presterende teams zien vaan Europees aofkoms: Bayern München, AC Milan, Inter Milan, Lazio Roma, Real Madrid, FC Barcelona, Manchester United, Arsenal etc. In Nederland make gemeinlek mer drei clubs kans op 't landskampioensjap: Ajax, Feijenoord en PSV. In 't Bèlsj zien FC Anderlecht en Club Brugge sterk.

Nederlands-Limburgse clubs die in 't betaold voetbal oetkoume zien Roda JC, VVV Venlo, Fortuna Sittard en MVV. Belsj-Limburgse clubs in 't betaold voetbal zien KRC Genk, Sint Truiden VV, BHZ en KVSK.

Ieste professioneel club in Nederland

Ein vaan de twie veurläöpers vaan Fortuna Sittard waor de ierste professioneel voetbalclub vaan Nederland.