Sub

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

De mergele kèrk van Sub

Sub of Suub (Nederlands: Sibbe) ies e dörp in de gemeinte Valkeberg aan de Geul in Nederlands Limburg. De luuj van Sub zègke "Sub" tege hun dörp (dat ies ouch de sjpelling volges Veldeke), terwiel me in Valkeberg "Suub" detege zaet. In Sub kalle ze Subs, dat ies óngevaer 't zelfde es 't Valkebergs van boete de paort.

Besjtuurlik haet Sub ièwelank bie Oud-Valkeberg gehuèrd. In Sub sjtóng ouch 't raodhoes van de gemeinte Oud-Valkeberg, dat woort later 't oud greun kruusgeboew. Dao sjteit noe de St.Rosa-den die eder jaor in augustus, mit de kèrmes geplant weurt.

De mergele kèrk van Sub ies gewiejd aan de heilige Rosa van Lima. Bies 1844 huèrde Sub en Iezere ouch bie de parochie Oud-Valkeberg; doe woort in Sub 'n kapel geboewd ónder arsjitek T. Dumoulin. Vanaaf 1866 woort de kèrktore geboewd door dezelfde arsjitek. De kèrk woort oetgebreid in 1927 nao 'n óntwerp van J. Beurskens. Tot 1948 waor de kèrk rectoraatskèrk, denao woort Sub 'n zelfsjtendige parochie.

't Subberhuuske

't Belangriekste geboew van Sub ies 't Subberhuuske (ouch waal Villartshoof geneump) , 'ne hièrehoof oet de 16e ièw. 't Geboew haet sjpeklaoge en 'ne hooktore en ies geboewd in Maaslandse Renaissance-sjtiel. In de loup van d'n tied ies 't Subberhuuske bewoond gewaes door versjillende adellike families. Ouch tegewoordig ies 't geboew es woonhoes in gebruuk door de familie Bennen.

Dörpsvereiniginge

• Harmonie Sint Rosa
• Zangvereiniging Eendracht
• Dameskoar Suub
• Carnavalsvereiniging de Böschule
• Jónkheid Suub-Iezere 1993
• SV Sibbe

Bekènde inweunersj

• Roy Willems, zenger van dialekmuziek
• De breursj Ger en Huub Harings, oud-coureurs (fietsrennersj)

Extern linke

• Harmonie Sint Rosa
• Joonkheid Suub-Iezere
• SV Sibbe
• Roy Willems