Geulem

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

Grotweuninge

Geulem (Hollesj: Geulhem) ies e gehöch in de gemeinte Valkeberg aan de Geul. 't Liek aan de rivier de Geul; de naam beteikent dan ouch: "heim aan de Geul". Geulem liek gedeiltelik in 't dal en gedeiltelik aan de Geulemmerberg en de Brakkeberg. Bies 1982 huèrde Geulem bie de gemeinte Berg en Terbliet, die doe opgegange ies in de gemeinte Valkeberg. Geulem ies e toeristeplaetske, veur e klein gehöch liegke d'r relatief väöl hotels.

Geulemmergroeve

De Geulemmergroeve ies e gangesjtèlsel in de berg, woa vreuger mergel woort gewonne. Bie d'n ingank van de groeve haet me e mergele beeld van 'ne blokbreker neergezat. In de groeve ies ouch 'n kapel gemaak.

Bezeenswaerdighede

Aan de Geulemmerberg in Geulem liegke ein aantal grotweuninge. Die zint bies in de 19e ièw in gebruuk gewaes es weuning veur de blokbrekersj en woorte in de jaore 70 van de 20e ièw gerestaureerd.

De Geulemmermeule dateert van veur 't jaor 1306, want op 27 oktober van dat jaor weurt ze geneump in ein akte es bezietting van 'ne zekere Goswijn van Berg. De meule haet e raad mèt bove-aandrieving aan eine meuletak van de Geul. 't Tegewoordige geboew, oet 1768, ies in gebruuk es hotel-restaurant.

Kesjtièl Geulziech ies e kesjtièlke oet 't ing van de 19e ièw, óntworpe door d'n architek Henri Reek oet Mestreech. 't Ies geboewd van mergel in neogotische sjtiel en liek aan de Brakkeberg. Saer 1937 ies hie e hotel gevestig.

Extern links

• Gesjiedenis van Geulem, door Jan Notten, op de site van de Heemkundevereiniging Houthem-Sint Gerlach