Maartje Paumen

Van Wikipedia

Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.


Maartje Paumen

Maartje Paumen (Gelaen, 19 september 1985) is 'n Nederlands-Limbörgse ex-hockeysjpeelster. Tösje 2004 en 2016 sjpeelde ze veur 't Nederlands vrouwe-èlftal.

Laeve[bewirk | brón bewèrke]

Paumen waor gebaore in Gelaen es kèndj van ènne aannummer en 'n kleuterleidster. Van kènjdsbein aaf waor ze door häör awwesj sjterk gesjtimuleerd in de hockeysjport. Häör eësjte club waor de HC Geleen. Later sjpeelde ze biej de Zitterd-Gelaense fusieclub HC Scoop. Häör definitieve óntdèkking kaom biej Oranje Zwart in Eindhove. In 2001, wie ze vieftieën jaor waor, kaom ze biej dees club in 't A1-maedjesteam, mèr nog in 't zelfde sjpeeljaor wórt ze in 't regulier A-èlftal gezat. Nao drie jaor ging ze nao HC Den Bosch, wat toen, wie noe nog ummer, oppermèchtig waor in 't Nederlandjs vrouwehockey. Ouch in 2004 maakde ze häör debuut in 't Nederlandjs èlftal op 't toernooj óm de Champions Trophey in Argentinië dat toen ouch gewónne wórt. Ze sjpeelde wiejer ónger mieë op 't WK Hockey van 2006 veur vrouwluuj en op de EK's van 2005 en 2007.

Häöre techniek wirt dèkser vergeleke mèt die van Mijntje Donners, mèt wae ze in Den Bosch same sjpeelde. Häör sjpecialiteit is score oet ènne sjtraofcörner. Biej dat lètste EK in 2007 leep ze aevel bie 't numme van zwou ènne sjtraofcörner 'n serieuze blessure op. Achteraaf bleek die minder erg es gedach en hersjtèlde zie vriej sjnèl zwoadat ze zónger probleme koosj mètdoon aan de Olympiesje Sjpele in Peking. Op dat toernooi, wat 't Nederlands èlftal oeteindelik zouw winne, wórt ze topscorer mèt ein veur Nederlandj óngekènd totaal van 11 gole, allemaol gescoord oet ènne sjtraofcörner. Ze kreeg de gouwe medalje oetgereik door prins Willem-Alexander.

In augustus 2009 voogde Maartje mèt häör Nederlandjs team eine nuje titel aan häör palmarès toe, noe woort ze in Amstelveen Europees kampioen door in de finale de Duutsje hockeysters mèt 3-2 te versjlaon. Saer 2011 is ze aanveurster van 't nasjenaal èlftal. Biej de Olympische Sjpele van 2012 in Lonje haolde dit team obbenuujts gouwt. Saer 7 fibberwarie 2013 is Paumen topscoorster aller tieje van 't Nederlandjs èlftal. In 2014 won ze es aanveurster 't WK hockey in eige landj. Nao de Olympische Sjpele van 2016 in Rio de Janeiro sjtopde ze es international.

In 2017 sjtapde Paumen euver van Den Bosch nao Royal Antwerp.[1] In mei 2018 maakde ze bekèndj drek te sjtoppe mit hockeye en coach te waere.[2]

Rifferenties[bewirk | brón bewèrke]

  1. Nu.nl - Paumen sluit bij Den Bosch af met winst in EuroHockey Club Cup
  2. Nu.nl - Maartje Paumen (32) beëindigt per direct indrukwekkende hockeycarrière

Extern links[bewirk | brón bewèrke]

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Maartje_Paumen&oldid=427523"