Kosovaars hierevoetbalèlftal
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
't Kosovaars hierevoetbalèlftal vertreujt Kosovo in internationaol voetbaltoernoje. 't Weurt gereguleerd door de Kosovaarse voetbalboond FFK. Sinds 2016 is de boond aongeslote bij de FIFA en de UEFA, zoetot de Kosovaarse èlftalle aon internationaol matche kinne mètdoen.
Historie[bewirk | brón bewèrke]
Nao 't oetereinvalle vaan Joegoslavië kaome in Kosovo nationalistische sentiminte op, en al in 1993 woort 'n officieus èlftal opgestèld wat vrundsjappelek tege Albanië späölde. Nao de Kosovo-oorlog in 1999 woort Kosovo de facto aofgesjeie vaan Servië, en gónge Kosovaarse speulers ouch neet zoe gaw mie in 't Joegoslavisch, Servisch-Montenegrijns of Servisch èlftal speule. (Sommege Kosovaars-Servische speulers dege dit nog wel.) In 2002 woort veur 't iers nao d'n oorlog 'n èlftal opgestèld, wat obbenuits vrundsjappelek tege Albanië späölde. De koumende jaore späölde dit team nog diverse aander matche, oonder mie tege Saoedi-Arabië boe 't in 2007 mèt 1-0 vaan won.
Naotot Kosovo ziech in 2008 oonaofhenkelek verklaorde vaan Servië, perbeerde de sportboond lid te weure vaan de internationaol voetbalboonde. Dat waor hendeg controversieel, umtot neet alle len - ouch neet alle Europese len - Kosovo es land erkinne en zoe'n acceptatie groete politieke gevolge kós höbbe. Oetindelek besloot de FIFA in 2014 vrundsjappeleke matche tege Kosovo touw te stoon. De ierste match oonder de nuie regel waor op 5 miert vaan dat jaor toes tege Haïti (0-0). In september 2015 besloot de UEFA tot gein bezwoere mie bestoonte tegen e lidmaotsjap vaan Kosovo. Op 3 mei 2016 kaom Kosovo, es 55e en veurluipeg lèste land, bij de UEFA. Tien daog later volgde aonsleting bij de FIFA.
De acceptatie vaan Kosovo, zoewie die vaan Gibraltar drei jaor ieder, waor zoe controversieel gewees tot de UEFA besloot in principe allein nog VN-lidstaote op te numme. Dit zouw beteikene tot Greunland, wat ouch aonsleting bij de groete boonde euverweug, neet welkom zouw zien.
't FIFA-lidmaotsjap vaan Kosovo kaom op tied om 't team aon de kwalificatie veur 't WK vaan 2018 te laote mètdoen. 't Team woort ingedeild in poule I, mèt oonder mie Iesland en Kroatië. Kosovo indegde stief oonderaon, mèt mer ein inkel puntsje (oet tege Finland gehaold) en doelciefers vaan 3-24. Op de UEFA Nations League vaan 2018 bleek evels tot ze zeker veuroetgónge. Waore ze bij de loting nog 't daarde zwaakste team vaan Europa, aon 't ind vaan de grópsfaas góng Kosovo mèt 14 punte en doelciefers vaan 15-2 souverein nao devisie C.