Klingerberg

Dit artikel is gesjreve (of begós) in 't Blieriks. Laes hie wie v'r mit de versjillende saorte Limburgs ómgaon.

---

Klingerberg is 'n wiek in 't naordweste van 't dörp Blierik in de Naord-Limburgse gemeinte Venlo. 't Haet óngeveer 4.000 inwoeners op 'n óppervlekde van 109ha, waodoor de wiek 'n deechde haet van 3.683 inwoeners je kilometer. In 2003 wuunde d'r in Klingerberg 4.360 inwoeners, in 2006 4.270 door 'n leechte bevólkingstruukgeng. In Klingerberg is evvel 7% 65 jaore of alder, mer zint de luuj mit enne laeftied tösse de 25 en de 64 jaore 't sterks vertegewaordig. Me kint de wiek opdeile in Klingerberg-Zuud en Klingerberg-Naord, mer me sprik meistal van ein wiek.

Klingerberg woort in de jaore '80 en '90 geboewd op 'n stök ald keltuurgrónk naeve doëj reveererme van de Maas. Op de hoegergelaege akkers woort de wiek geboewd en in de dale, wao-onger 't Egerbósbaekdaal, waas weigrónk. Dao van is noe neets mer te zeen. De Klingerbergsingel is de hoofweeg en tegeliek ouk de langste straot. Alle anger straote zeen verneump nao struuke en buim. Klingerberg is verneump nao de geringe, gelieknamige hoëgte aan de rank van de wiek. De wiek wuurt wiejer vanaaf 't weste in tegewiezerszin begrens door d'n Rieksweeg 73, d'n Eindhoveseweeg (N556), d'n Ulkenshofweeg en de Henriette Roland Holstlaan.

Mit 't äöpebaar vervoer is Klingerberg bereikbaar mit lien 4 tösse 't centraal stasie in Venlo en truuk. De liendeenst wuurt verzörgt door verveurder Veolia. De wiek haet dreej haltes.

Brón

• Gedetailleerde gegaeves euver de wiek