Boekvlees
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
't Boekvlees of peritoneum is de laog die van binne de boekholte enne dao-in gelaenge organe beklèdj. Bie de miens zeen dees de maag, d'n dónnen derm, d'n diekken derm, de laever en 't miltj, en bie vrólje ouch de baarmoder enne eierstekker. De nere, de bienere, d'n twellefvingerigen derm, de blaos enne prostaat ligk mieër achter of ónger 't boekvlees, al staeke ze deils waal oet inne boekholte, en zeen ze aan häöre boetekantj deils beklèdj mit boekvlees. 't Boekvlees ane binnekantj vanne boek is 't peritoneum parietale; det ane boetekantj vanne inwenjige organe is 't peritoneum viscerale. Tösse dees twieë blajer van 't vlees bevindj zich 'n ruumdje worin hieël klein wieväölhejen aan vrie voch zitte, zodet alle inwejige organe vanne boekholte mekkelik langsein aaf kónne glieje, veur beveurbeildj de spiesvertaering. 't Boekvlees haet gein aope verbinjing mitte boetewerreld, behauve bie vrólje via de eileiers, baarmoderholte, cervixkenaal enne sjede; deze waeg is normaal aevel good aafgeslaote taenge binnedringendje micro-organisme door besjurmendje sliemproppe. De boekholte is normaal den ouch steriel.