Soennisme

Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.

't Soennisme (Arabisch: أهل السنة والجماعة, 'ahl as-sunnah wa l-jamāʻah' of aafgekót: أهل السنة, 'ahl as-sunnah') is ing va de twieë groeëte sjtrominge binne d'r islam. De anger groeëte sjtroming heesjt sjiisme. 't Soennisme lieët zich óngerverdele i versjillende madhahib (rechssjoeële), woeva 't hanafisme mit 45% va de moslims wiedoet de groeëtste is. De sjoeële versjille evvel neet zoeë sjterk vanee.

Geleuf

Soenniete volge de traditie die gebaseerd is op de Hadith, de uueverleveringe uuever profeet Mohammed. Dees zint neëve d'r Koran en de idjma, wat zich óngevier lieët vertale es consensus, de wichtigste brónne va 't geleuf va soennitische moslims. De Hadith vörme de brón vuur de sjaria, 't islamitisch rech. E groeët versjil mit 't sjiisme is 't geleuf dat profeet Mohammed noeëts ieëmes zouw höbbe aageweze es zinne ópvolger.

Versjpreiding

I totaal is 80 bis 90% van de moslims soenniet. Van aodsher vörme ze de mieërderheed óp 't Arabisch Sjiereiland, woe ooch de vuur moslims hillige sjtad Mekka ligk. Van doa-oet hant soenniete hun geleuf versjpreid noa Noord-Afrika, dele va Zuud- en Centraal-Azië en dele va Zuudoes-Azië. In Europa vörme ze 'n wichtige religieus minderheed en uuevergroeëte mieërderheed ónger de moslims, ónger mieë durch immigratie seër de twieëde haofsjeet van d'r 20e ieëw.