Siegfried & Roy
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Siegfried & Roy waoren e Duits-Amerikaons duo vaan goochelere en biestetemmers, wat bestoont oet Siegfried Fischbacher (1939-2021) en Roy Horn (1944-2020). De twie woorte bekind door hun spectaculair shows mèt wèl bieste, in 't bezunder (witte) tiegers en liewe, die ze in hun trucs dèks dege verdwijne en versjijne.
Siegfried woort gebore in Beiere, dewijl Roy oet 't huieg Nedersakse stamde. Ze lierde ziech in 1960 aon boord vaan 't cruisesjeep Bremen kinne, boe Siegfried al es goocheleer wèrkde en Roy in de bedening zaot. Siegfried deeg toen al shows mèt 't luipeerd Chico. In 1963 stoonte ze same in 't Hambörgs Hansa-varietétheater. Dat zörgde veur 'nen doorbraok, en e jaor later beïndegde ze hun werk es potsemekers op 't sjeep um in Breme in 't Astoria-theater aon 't werk te goon. Aonsletend dege ze 'nen tournee nao oonder mie Monte Carlo, Paries en Las Vegas.
Ze kierde de jaore dao-op nog dèks nao Las Vegas trök, en vaanaof 1974 woort dit min of mie hun vaste standplaots. Hunne show in 't MGM-theater mèt 'ne bröllende liew ('t logo vaan dees filmkompenei) waor iconisch en maakde tot väöl aander theaters en hotels in de stad ouch goochelere inhuurde. Wat oersprunkelek 'n veurstèlling vaan twinteg minute woar, woort in 1981 'ne show vaan wel hoonderd menute. De Beyond belief-show zouw tot 1988 in 't New Frontier-hotel loupe. Dat jaor kraoge de twie ouch Amerikaons börgerrech. Ze wèrkde in deen tied ouch same mèt Michael Jackson.
Sinds 1990 waore ze de vaste hoesartieste vaan 't Mirage-hotel, boe ze oonder e viefjaoreg contrak vaan 57,5 mieljoen dollar in deens waore gekoume. De show zaot vol mèt spektakel oet de musicalwereld en trok väöl bekinde muzikante en aander artieste. Bekind woorte ze mèt de witte tiegers die in de shows mètspäölde. Ze zatte heiveur zelfs e speciaol fokprogram op. In 2001 woort hun contrak leveslaank gemaak.
Op 3 oktober 2003 woort Roy levesgevierlek gewoond wie 'nen tieger häöm aonveel. Heer euverleefde d'n aonval mer zjus en kaom blievend in 'ne rolsteul. Heimèt kaom de carrièr vaan Siegfried & Roy astrein tot 'n ind. Noe en daan dege ze nog wel optrejjes, wie in 2009 es ieregas bij de hereupening vaan 't Hansa-theater. Oetindelek storf Roy in 2020 aon COVID-19. Siegfried góng 't jaor drop doed, aon alvleisklierkaanker.