Sede vacante

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

In sede vacante dreug 't Vaticaon 'n wapecompositie zoonder pauselek waope, mèt allein 't pauselek umbraculum en de Sleutele vaan Petrus.

Sede vacante (Latijnse absoluten ablatief: 'in/mèt/bij lege zitplaots', of Italiaons 'lege zitplaots' zoonder mie) is de aofwezegheid vaan 'ne prelaot in n'importe wat veur kathelieke instèlling. Gans in 't bezunder meint me heimèt de staot boe-in 't Vaticaon verkiert wienie 't geine paus gief.

De sede vacante begint zoe gaw es 'ne prelaot störf of zien amb opgief, en indeg wienie 'nen opvolger is verkoze. In 't Vaticaon zien aon allebei - veural aon 't keze vaan 'nen opvolger - streng rituele verboonde. De sede vacante begint daan ouch neet iejer es de paus volgens traditie is doedverklaord, en indeg wienie 't colleesj vaan kardinaole 't conclaaf verliet.

Mèt de sede vacante bringk 't Vaticaon nao geweente ouch speciaol poszegele en munte oet, zoonder de kop vaan de paus. Umtot dezen tied neet ieweg doort (gemeinelek minder es 'ne maond), zien die hendeg geleef es verzaomelobjekte.