Rósse
Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.
Rósse (Róssisj: русские, roeskië) vörme e Oeës-Slavisj volk va luuj die inheems zint aan dele va Rósland en de Oekraïne. Zie kalle Róssisj. De mieëtste Rósse zint Róssisj-orthodox, mar vöal Rósse zint óch neet-geleuvig of praktisere i gieëker geval gee geleuf, wat 't gevolg is van 't sjtaatsatheïsme oet d'r Sovjettied. In Rósland make ze zó'n 80% van de bevolking oet.
Weltwied guuef 't zó'n 134 mieljoeën Rósse, oeëva zieëker 117 mieljoeën i Rósland, 7 mieljoeën i g'n Oekraïne, 3,5 mieljoeën i Kazachstan, 3 mieljoeën in de VS, 1,8 mieljoeën i Brazilië, 1,2 mieljoeën in Duutsjland, 938.000 in Israel, 809.000 in Oezbekistan, 706.000 in Wit-Rósland en 622.000 i Canada. Rósse vörme wiejer óch 'n groeëte minderheed in vuurmalige Sovjet-rippeblieke wie Letland (ca. 487.000), Kirgizië (ca. 353.000), Esland (ca. 323.000), Moldavië (201.000, m. n. i g'n separatistische regio Transnistrië) en Litouwe (ca. 130.000).
Vanaaf de 17e ieëw woeëde Rósse same mit de Witrósse, Roethene en Oekraïnesj gezieë es ee volk, wat truukging op 't Kievs Riek. Noa de Róssisje Rivvelutie verangerde dat koncep evvel noa 't hudig.
Bekinde Rósse[bewirk | brón bewèrke]
- Fjodor Michajlovitsj Dostojevski, sjriever
- Michail Gorbatsjov, politiker
- Boris Jeltsin, politiker en d'r ieësjte prizzedent va Rósland
- Wassily Kandinsky, kunsteneër
- Dmitrij Ivanovič Mendeleev, sjemis en grónklegker van 't periodiek systeem
- Alexander Poesjkin, dichter
- Kirill va Moskou, patriarch van de Róssisj-orthodoxe Kirk
- Vladimir Poetin, politiker en prizzedent va Rósland
- Anna Paulowna va Rósland, groeëtvorstin va Rósland
- Nicolaas II va Rósland, d'r letste tsaar va Rósland
- Andrej Sacharov, politiker en minsjerechteaktivis
- Igor Stravinski, komponis
- Leo Tolstoj, sjriever
- Leon Trotski, politiker en rivvelutionair
- Pjotr Iljitsj Tsjaikovski, komponis