President vaan de Europese Unie
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
D'n officiëlen titel President vaan de Europese Unie (Europese president of President vaan Europa) besteit (nog) neet mer 't gief drei posities binne de instèllinge vaan de Europese Unie (EU) die dèks weure besjreve es presidentssjappe:
- President vaan d'n Europese Raod (sinds 1 december 2019: Charles Michel)
- President vaan de Europees Kemissie (sinds 1 december 2019: Ursula von der Leyen)
- Veurzitter vaan 't Europees Parlemint (sinds 3 juli 2019: David Sassoli)
Europese president in de media[bewirk | brón bewèrke]
Nao 't Parlemintsveurtzitterssjap weurt zoe good es noets in de media geriffereerd es me 't heet euver "d'n Europese president". Al steit in officieel documinte besjreve tot 't veurzitters- of presidentssjap (de twie bezeje weure allebei gehanteerd veur dezelfde meining) vaan 't Parlemint bove de veurzitters- of presidentssjappe vaan de Raod en de Kemissie steit, is 't klaor tot in de allewijl polletiek vaan de EU de Raodspresident en Kemissiepresident väöl mie aonzien höbbe. Zoe zien dees lèstgeneumpde figure aonwezeg bij externe ("boetelandse") representatie vaan de Unie, same mèt d'n Hoege Representant vaan de Unie veur Boetelandse Affaires en Veilegheidsbeleid. De Parlemintsveurzitter heet niks te zègke euver externe affaires. Sterker nog: heer heet ouch niks te zègke euver intern polletiek. Heer leit de discussies binne 't Parlemint en representeert de oetkoms vaan stömminge binne 't Parlemint.
Nao de Raodspresident en de Kemissiepresident riffereert me, dao-intege, hiel dèks es de president vaan Europa. Dit zörg veur väöl verwarring bij lui umtot de twie presidentssjappe dooreint weure gegoeid. De Raodspresident is evels deginnege dee discussies tösse nationaol leiers vaan de lidstaote binne d'n Europese Raod mot leie en ouch stömminge tösse die leiers mot organisere um wètte oet 't Europees Parlemint en de Europees Kemissie naomes de Raod good of aof te käöre. De Kemissiepresident is deginnege dee naomes de Kemissie (de executieve mach vaan de EU) wètte mot veurstèlle aon 't Parlemint en de Raod.
Dit geobserveerd te höbbe, gief 't versjèllende arguminte boerum d'n eine d'n Europese President is en d'n aandere neet. Aon d'n eine kant kump de Kemissiepresident op pepier 't meiste in de contreie vaan e staotshoof, umtot de Kemissiepresident en de Kemissie de einsegste zien die wètte mage veurstèlle aon 't Parlemint en de Raod. Aon d'n aandere kant höbbe de EU-lidstaote in de praktiek nog ummertouw 't hoegste woord in de Europese polletiek, deils umtot zie eine veur eine vetorech höbbe, deils umtot zie sömpelweeg nog altied de meiste polletieke legitimiteit oonder de Europese bevolking genete. Heidoor maag op pepier de Raod 't belaangriekste instituut vaan de EU zien mer in praktiek is dat toch dèks d'n Europese Raod. Rizzelterend geneet de Raodspresident väöl mach umtot dee president ziech meujt mèt de nationaol leiers en umtot de media-aondach nog groetdeils ziech riech op de Raod en daomèt mie op de Raodspresident es op de Kemissiepresident.
Raod vaan de Europese Unie[bewirk | brón bewèrke]
Binne de Raod vaan de Europese Unie gief 't eder haaf jaor ouch 'ne lidstaot dee 't Presidentssjap vaan de Raod vaan de Europese Unie euvernömp. Evels weurt dit presidentssjap bekans noets in de bovegeneumde categorie geplaots. 't Gief bij dit routerende Raodspresidentssjap naomelek geine president.
Meugeleke EU-President in de touwkoms[bewirk | brón bewèrke]
't Verdraag vaan Lissabon stèlt tot 't in prinsiep meugelek is um de functie vaan de Raodspresident euver te drage aon de Kemissiepresident, umtot de Europees Kemissie in theorie de einsegste executieve mach is vaan de EU (al weurt d'n Europese Raod allewijl meistes ouch besjreve es 'n executieve mach umwille vaan zien groete polletieke invlooj op de wètte die oet de Kemissie komme). 't Aofsjaffe vaan de Raodspresident, mèt es gevolg 't euverdrage vaan de Raodspositie aon de Kemissiepresident en daomèt de realisering vaan 'nen EU-President, kin evels allein gebäöre mèt touwstömming vaan d'n Europese Raod. 't Is zier meugelek tot dit dus noets geit gebäöre, umtot nationaol leiers bang zien väöl mach in te lievere es zien "hunnen eigen" oonderhandeleer kwiet zien en allein nog meh in gesprek kinne mèt 'ne president dee de belange vaan de EU veurop stèlt.