Populisme
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Populisme (vaan 't Latien populus, volk) is 'n meneer vaan polletiek communicere en bedrieve boe-in de centraol tegestèlling weurt geplaots tösse 't zoegenaomp volk en de zoegenaomp elite en boebij de populis de kant vaan 't volk kees. Dees concepte kinne op versjèllende menere weure ingevöld, zoetot 't links-populiste, rechs-populiste en versjèllende aander types gief. 't Populisme heet daomèt gein uniform ideologie volges de meiste politicologe.
De Nederlandse politicoloog Cas Mudde, dee internationaol gezeen weurt es 'nen toenaongevende weitesjapper in populisme, neump 't populisme 'n "dun ideologie" (thin ideology), die oetgeit vaan 'n sameleving die te verdeile is in twie homogene, tegegestèlde gróppe: 't zuver volk contra de corrupte elite. De populis prittendeert tot de wèl vaan 't zuver volk in ziene stried tege de corrupte elite te reprizzentere. De ideologie is "dun" umtot 't populisme volges Mudde 'n gashier-ideologie nudeg heet (väölal nationalisme of socialisme) die 't 'n ideaol en 'n riechting geef. Dit is veural umtot 't populism gein klaor ikkenomische ideologie aonhink, boedoor dees partije rap in stumgedraag kinne veraandere um te kinne inspeule op actueel oontwikkelinge.
Populisme weurt in de politicologie dèks in verband gebrach mèt 't fale vaan de allewijl constitutioneel democratie, mer academici zien 't dèks ooneins in wieveer populisme perbleme veur de democratie creejeert en in wieveer populisme e symptoom is wat de perbleme vaan 'n democratie bloetlègk.