Paul van Vliet
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Pieter Paulus (Paul) van Vliet (D'n Haag, 10 september 1935 - ouch dao, 25 aprèl 2023) waor 'ne Nederlandse cabaretier en zenger.
Leve
[bewirk | brón bewèrke]Jäög
[bewirk | brón bewèrke]Van Vliet woort in 1935 gebore in 't centrum vaan D'n Haag, in 't hoes vaan zien grammeer. Heer greujde op in de volksere wiek Bezuidenhout. Ziene pa waor wever vaan wandkleier, poppespeuler en teikelierer. Zien moojer deeg datzelfde beroop. De femilie waor vaan hoes oet orthodox-prottestans; ziene grampeer Pieter van Vliet zaot jaorelaank veur de ARP in de Twiede Kamer. In d'n Hollandsen Hoongerwinter góng heer wie mie kinder nao 't platteland, en wel nao Garijp in Friesland. Wie heer in juni 1945 trökkaom waor de femilie verhuis nao Benoordenhout, umtot 't hoes in Bezuidenhout bij e bombardemint waor verweus.
Nao de lieger sjaol góng heer nao 't christelek gymnasium Sorghvliet, boe heer in 1954 exame deeg. Nao zien exame leep 'r 'n haafjaor stage bij de Nieuwe Haagse Courant, 'n orthodox-prottestantse gezèt. Daonao góng 'r in deens. Zoewel op sjaol es in deens wèrkde heer al mèt in cabarètveurstèllinge en revues; op sjaol oonder mie mèt Dolf de Vries.
Vreug carrièr
[bewirk | brón bewèrke]In 1956 góng Van Vliet nao Leiden veur te studere; iers historie, e jaor later rechte. Dao-in studeerden 'r in 1963 aof. Oonder ziene studententied woort heer veur 't iers bekind mèt cabarèt; heer riechde mèt Floor Kist 't Leidsch Studenten Cabaret op. Dit gezelschap zouw oetindelek vaan 1957 tot 1969 bestoon, dus laank nao Van Vliet zienen eige studententied. De gróp deeg hoonderde veurstèllinge en traoj ouch in 't boeteland op.
Direk nao zien aofstudere begós Van Vliet same mèt Fred Hugas aon e nui gezelsjap. Heer deeg daoveur ouch zien eige theater ope, PePijn, in e leegstoond pakhoes in 't centrum. In 't theater kóste mer hoonderd lui, meh 't waor dèks oetverkoch. 't Cabarèt PePijn leep tot 1971; 't theater besteit nog ummer en stoont tot 1971 oonder behier vaan Paul van Vliet.
Solo
[bewirk | brón bewèrke]Vaanaof 1970 góng Van Vliet solo in 't theater stoon. Mèt ziene show Een avond aan zee woort heer direk lendelek bekind. Oet deze show kaom oonder mie 't type "Bram van de commune" ('nen hippie) en 't leedsje "Meisjes van dertien". De aofwisseling tösse sketsjes mèt typekes en geveulege, good gesjreve leedsjes zouw typisch veur ziene stijl weure. De ganse jaore zeventeg waor heer populair, en wie tegen 't ind vaan dat decennium 't Nederlands cabarèt achteroet leep waor heer mesjiens wel de populairste vaan allemaol.
In de jaore tachteg en negenteg leep zien cabarètcarrièr get trök, umtot 'n nui ginneratie mèt 'nen hellere stijl waor opgestande. Wel waor heer vaanaof 1994 succesvol es professor Higgins in de musical My fair lady, 'n veurstèlling die ummer woort bijgebook. Ouch zaog me häöm sinds 1992 dèks es ambassadeur veur UNICEF. In 2007 stapde heer euver nao 't 'serjeus' theater in de veurstèlling Liefdesbrieven, die 'r mèt Anne-Wil Blankers späölde. Ouch 't opleie en oontdèkke vaan nui talent bleef häöm bezeghawwe: heer startde in 2011 de Paul van Vliet Academie, boe 'r ouch zelf lesgaof.
Tot op hoege leeftied bleef heer shows geve. Wie heer in 2012 trök verhuisde nao D'n Haag späölde heer nog vief jaor laank programma's op zondag.
Doed
[bewirk | brón bewèrke]Paul van Vliet storf op 25 aprèl 2023 nao e kort kraankebèd. Heer woort begrave op Oud Eik en Duinen in zien woenplaots. In 2025 woort in D'n Haag e standbeeld vaan 'm oonthöld, gemaak door Loek Bos.