Modern heidedóm

Van Wikipedia
(Doorverweze van Modern heidedom)
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Wiccaceremonie mèt Beltane, 't Keltisch midzomerfies. De Wicca is 'n syncretische nui religie die op diverse heidense tradities trökgrip.
Ieslandse aonhaangers vaan 't Germaans heidendóm (Ásatrú).

Oonder Modern heidedóm versteit me alle religieus geluifssysteme en/of gebruke die sinds de negentiende iew meh veural nao d'n Twiede Wereldoorlog es (of es deil vaan) subcultureel struiminge opkaome en es regel inspiratie hole oet verdwene 'heidense' (polytheïstische) godsdeenste. De maot woe-in dees religies de aw, gans in oonbruuk geraakde tradities getrouw volge versjèlt nogal; sómmege struiminge zeuke wèrkelek de pre-christeleke religies te doen herleve, andere gebruke die allein es inspiratiebrón veur e nui (syncretisch) geluif. Ouch 't doel en de filosofie vaan de religies löp oeterein: 't korter bij de natuur wèlle stoon kump väöl veur, meh ouch nationalisme kin 'n rol speule. In mier vaan die gevalle is 't modern heidedóm 'n reactie op de groete wereldreligies, en dèks ouch 'n alternatief veur 't atheïsme, agnosticisme of verwante neet-religieus filosofieë. Struiminge höbbe soms ouch occulte eleminte; miestens evels neet.

De meis umvangrieke poginge veur 'n aw religie nui leve in te bloze zien 't druïdisme, 'n reconstructie vaan de Keltische, veural Britse, religie. Dit woort al in 1792 gestiech door Iolo Morganwg. Grupkes die tot dees struiminge behure umvatte zeker tiendoezende, mesjiens mie es hoonderddoezend lejer. Me moot daobij neet oet 't oug verlere tot 't druïdisme 'n vrij reconstructie is, al gief 't ouch gemeinsjappe die de Keltische religie getrouwer naovolge. Ouch de religie vaan de aw Germane heet versjèllende poginge tot nui-opriechting gekind. Sommege vaan die grope ligke evels in neo-nazistisch vaarwater, andere zien sterk geassocieerd mèt aggressief acties wie kèrkverbrandinge. De mierderheid vaan de lui die dees godsdeenste oetveure höbbe dao gein associaties mèt. Ouch de religies vaan de Klassieke Aajdheid weure wel bedreve.

De succesvolste vaan allemaol zien evels de werkelek nui religies. Veural de Wicca is veur 'n nui religie hendeg wiedverspreid en krijg nug ummer mie volgelinge. Me sjat tot euver de ganse wereld oongeveer ein miljoen lui ziech mèt zoe'n praktieke bezeghawwe. 't Mierendeil vaan de modern heidene is joonk; ouch euverheers 't vrouwelek geslach, in 't bezoonder bij de Wicca-echtege struiminge.

't Modern heidedom waor, oonder väöl mie geluifssysteme, vaan invlood op de New Age-beweginge, boe zeker euverlap mèt besteit.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Modern_heidedóm&oldid=428675"