Mathieu Cordang

Van Wikipedia
Gank nao: navigatie, zeuke
Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Venloos, as te dit dialek sjpriks.

Mathieu Cordang

Mathieu Cordang (Blerick, 26 december 1869 - Zjwame, 29 mieërt 1942) waas eine Nederlandse wielerpioneer.

Biografie[bewirk | brontekst bewerken]

Cordang blónk oet op de wielerbaan, mèt name op ’t nummer sjtayere en oppe waeg in wedsjtrieje euver lang aafsjtenj.

Es amateur woort Cordang in 1895 in Kölle waereldkampioen sjtayere. Ouch wón hae lange aafsjtandswedsjtrieje die al lang neet meë besjtaon, zoa-es Amsterdam-Arnhem-Amsterdam. In 1894 vestigde hae ein waereldrecord op de miel op de tandem. Ein jaor later versjloog hae in eine "wedsjtried" de sjneltrein Mesjtreech-Remunj!

Mathieu Cordang waas professional van 1896 pes 1900. In 1897 óntging häöm de euverwinning in Paries-Roubaix wiej hae op de wielerbaan van Robaais (Roubaix) kaom te valle. 't Hoagdepuntj van zien profcarrière kaom in 'tzelfde jaor. Op de wielerbaan in Crystal Palace in Londe reej hae mèr leefs vief waereldrecords. Zoa reej hae de Bol d'Or van 1900 i ein waerelddaagrecord, door (mèt gangmaking) in 24 oer 999 kilomaeter en 651 maeter te fitse.

Daonao góng Cordang zich weer toelègke op 't sjtayere. In 1898 wón hae de Groate Pries van Amsterdam. Biej de Olympische Zomersjpele 1900 in Paries wón hae goud op de 3 kilomaeter, mèr deze koers van professionals woort later neet officieel erkènd door 't IOC. Veurdat hae beroepsrenner woort waas Cordang matroas op de groate vaart. Nao zien wielercarrière hej hae ein garagebedrief in Zjwame. Hae is gesjtórve in 1942 op 72-jaorige laeftied aan ein lóngóntsjtaeking.

Paries-Roubaix 1897[bewirk | brontekst bewerken]

In de wedsjtried Paries-Roubaix van 1897 laog Cordang same mèt de Fransman Maurice Garin op kop. Wiej de tweë kampioene op de baan in Roubaix versjene woorte ze ónthaold door ein dolenthousias pebliek dat al sjtaonde de tweë helde toejuichde. ’t Waas aevel heël meujlik óm ze te herkènne. Garin reej veurop, gevolg door de Cordang dae van above pes ónger ónger de modder zaot. Opaens sjlipde Cordang tot verbiestering van jederein óngeroet en veel op de betónne baan. Garin koosj zien gelök neet op en veurdat Cordang weer op ziene fits zaot, haw hae eine achtersjtand van meë es 100 maeter. D’r moosjte aevel nog zös runj aafgelag waere, tweë kilomaeter óm nog te perbere óm Garin in te haole. ’t Pebliek heel ziene aojem in wiej 't de óngeluifelikke achtervolgingswedsjtried aansjouwde. Wiej de bel veur de lètste runje van 333 maeter klónk, hej Garin nog mer eine veursjprunk van 30 maeter op de Limburger. Garin hej ein klassieke euverwinning veur 't griepe, mer hae veulde de heite aojem van ziene taengesjtander in ziene nek. Öndanks alles, heel Garin aan de eindjsjtreep nog eine veursjrunk euver van neet meë es twee maeter, tweë maeter veur ein legendarische euverwinning. De meinigte explodeerde en de twee rennersj woorte bedólve ónger de ovaties. Garin leet zich bejubele door de massa, en Cordang, de bèste renner van daen daag, koosj waal hule van teleursjtèlling. Wat zien groatste euverwinning oet zien carrière moosj waere góng door dómme pech neet door. [1]

Eërelies[bewirk | brontekst bewerken]

  • 1894
    • Amsterdam-Arnhem-Amsterdam
    • Mesjtreech-Nijmege-Mesjtreech
    • Rotterdam-Utrech-Rotterdam
    • Waereldrecord 1000 km op de baan
  • 1895
    • Amsterdam-Arnhem-Amsterdam
    • Leide-Utrech-Leide
    • Mesjtreech-Remunj (wedsjtried mèt de trein)
    • Waereldkampioen 100 km sjtayere
  • 1896
  • 1897
  • 1898
    • 100 km GP Roubaix
    • 100 km GP Amsterdam
    • 200 km GP Berlien
  • 1899
    • 100 km GP Den Haag
    • Waereldrecordhawwer 24 oer (1000,110 km)
  • 1900
    • Bol d'Or (24-oer in Vincennes-Paries) veur Maurice Garin
    • Goud op 3 km Olympische Sjpele (neet officieel erkènd)

Referenties[bewirk | brontekst bewerken]

  1. Sergent, Pascal (1997), trans Yates, D., A Century of Paris-Roubaix, Bromley Books, UK, ISBN 0-9531729-0-02

Externe link[bewirk | brontekst bewerken]

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Mathieu_Cordang&oldid=349557"