Mark Veens
- Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Venrods, es te dit dialek sjpriks.
Mark Hermanus Maria Veens (Venray, 26 juni 1978) is 'ne veurmalige Nederlandjse topzjwömmer dae gesjpecialiseerd waas in de vrieje sjlaag, mèt name de de korte aafsjtand.
Loupbaan[bewirk | brón bewèrke]
Hae maakde es zjwömmer zien internationaal debuut biej de Europese kampioensjappe van 1995 in Wene. Ziene doorbraak belaefde de breidgesjouwerde sjprinter oet Limburg aevel in 1998 biej de Europese kampioensjappe kortebaan (25 maeter) in 't Èngelsje Sheffield. Veens haolde dao op de 50 maeter vrieje sjlaag ein tweëde plaatsj en zjwóm mèt 21,79 ein perseuënlik record én Nederlandjs record en op de 100 maeter vrieje sjlaag mèt 47.97 ouch ein perseuënlik record. Mèt dees tieje sjtóng hae destieds in de mondiale top vief van 't wèntjerseizoen 1998-1999. Ein hauf jaor later wón hae de brónze medajje biej de Waereldkampioensjappe zjwömme kortebaan 1999 in Hongkong.
Op de langebaan (50 maeter) daorentaenge bleef de groate doorbraak oet. Veens moosj zich, in de sjaduw van Pieter van den Hoogenband, tevraeje sjtèlle mèt deilname(s) aan de estafetteploog op de 4x100 maeter vrieje slag. In 1999, biej de Europese kampioensjappe langebaan in Istanboel, maakde 't Jerommeke van de Nederlandjse ploog deil oet van de ploog die de gouwe medajje wón op de 4x100 maeter vrieje sjlaag estafette. Ein jaor later woort hae es estafettezjwömmer geselecteerd veur de Olympische Sjpele in ’t Australische Sydney. Hiej belaefde Veens de groatste deceptie oet zien loupbaan, wiej de kansrieke 4x100 maeter ploog in de series door ein te vreuge euvername van Dennis Rijnbeek woort gediskwalificeerd. Neet väöl later bleek biej zien club, ’t Eindhovese PSV, gein plaatsj meë te zeen veur Veens in de net opgerichte Philips-profploog van coach Jacco Verhaeren.
Veens bleef 'Eindhove' desóndanks trouw en wis zich ónger leijing van trainer Eric Landa te plaatsje veur de estafetteploog (4x100 vriej) veur deilname aan de waereldkampioensjappe 2001 in Fukuoka in Japan. Hiej lègkde hae same mèt Klaas-Erik Zwering, Johan Kenkhuis en sjlotzjwömmer Pieter van den Hoogenband besjlaag op 't zilver.
Ein sjleipende sjouwerblessure beteikende aevel opnuuj taengesjlaag veur Veens, wonao ouch nog èns ziene coach Landa nao Singapore vertrok. Ónger daene ziene opvolger Mandy van Rooden maakde hae ziene comeback en maakde hae biej de EK kortebaan-toernoje van 2002 in Riesa en van 2003 in Dublin deil oet van de winnende ploge op de 4x50 maeter vrieje sjlaag. In mieërt 2004 zjwóm hae in zien thoesbad in Eindhove mèt Klaas-Erik Zwering, Gijs Damen en Pieter van den Hoogenband ein officieus waereldrecord op 't zelfde óngerdeil in ein 50-maeterbad. Door dees prestaties dwóng Veens opnuuj kwalificatie veur de Olympische Sjpele van 2004 in Athene aaf.
Eindj 2005 veraoverde Veens biej de Europese Kampioensjappe kortebaan opnuuj op de 4x50 maeter vrieje sjlaag de gouwe medajje, same mèt Mitja Zastrow, Gijs Damen en Johan Kenkhuis, in 1.25,03. Deze tied waas ouch weer good veur ein nuuj waereldrecord. Op de 50 maeter vrieje sjlaag zjwóm hae zich nao ein zilvere medajje.
In 2006 kroog hae weer taengesjlaag te verwirke. Ein ónwillige peesaanhechting biej de kneej versjtoarde zien veurbereijing op de EK en ouch ziene sjouwer begoosj weer op te sjpele. Nao ein operatie begin oktober richd Veens zich gans op zien ultieme doel: de Olympische Sjpele van Beijing in 2008. Mer zien lief wouw neet mee mitwirke en nao nuje taengesjlaag veur de aanvank van de Nederlandjse Kampioensjappe in juni 2007 besjoot hae eine puntj achter zien imposante zjwömcarrière te zètte.
Nationaal titels[bewirk | brón bewèrke]
- Korte baan
- 50m vrieje sjlaag 1997, 1998, 2000, 2002, 2003, 2004
- 100m vrieje sjlaag 1998, 2000
- Lange baan
- 50m vriej sjlaag 1996, 1998
- 50m rögksjlaag 1997, 1998, 2000
- Sjprint
- 50m vlindersjlaag 1996, 1997
- 50m rögksjlaag 1997, 1998
- 50m vrieje sjlaag 1997, 1998, 2002, 2006
Perseuënlikke records[bewirk | brón bewèrke]
- 50m vrieje sjlaag
- 100m vrieje sjlaag
- 200 maeter vrieje sjlaag
- 25 mater bad 1.51.81 (Sydney 1998)
- 50 maeter rögksjlaag
- 50 maeter vlindersjlaag