Marco Borsato

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Marco Roberto Borsato (Alkmaar, 21 december 1966) is 'ne Nederlandse popzenger.

Borsato woort gebore es zoon vaan 'nen Italiaonse pa en 'n Nederlandse ma. Heer kraog in 1990 oet 't niks lendeleke bekindheid doortot 'r mètdeeg aon de Soundmixshow op RTL 4. Nao e paar cd's in 't Italiaons perbeerde heer 't in 1994 in 't Nederlands. Zie leedsje "Dromen zijn bedrog" woort zoe'ne groeten hit tot heer die keus definitief maakde. In de jaore die volgde zouwe nog väöl hits koume, dèks ouch nommer 1. De vaste componis vaan väöl vaan zien meziek is John Ewbank.

Heer deeg ouch duètte mèt versjèllende Nederlandse artieste, oonder wee rapper Ali B, dee nao 't duèt "Wat zou je doen" ouch boete de wereld vaan hiphop-leefhöbbers lendeleke bekindheid kraog. Veur Zien, 'n album wat allein op dvd oetkaom, wèrkde heer same mèt groete rezjisseurs wie Dick Maas en Theo van Gogh. Zienen hit "Rood" oet 2006 (ouch nómmer ein) waor 't beginpunt vaan Symphonica in Rosso, 'n serie massakonzèrs in de Gelredome die jaorelaank heet geloupe. Mèt de film Wit licht oet 2008 maakde Borsato ouch zie debuut es acteur. Wijer deeg heer jaorelaank jurywerk veur 't tv-program The voice of Holland.

In zie privéleve trok Borsato door zie houwelek in 1998 mèt modèl Leontine Ruiters. Dit houwelek indegde in 2020 nao 'n affair vaan Borsato mèt pianiste Iris Hond. In 2023 kaom Borsato veur de rechter nao aongifte vaan 'n jóng vrouw die es minderjaorege door Borsato zouw zien misbruuk. De zaak deende in 2025 en indegde oetindelek in vrijspraok. Door alle tumult in zie privéleve zaog 'r gooddeils aof vaan 't meziek make. Sinds 2017 heet 'r gei nui album oetgebrach; wel brach heer in 2021 de single "Een moment" oet.

Discografie

Emozioni, 1990
Sento, 1991
Giorno per giorno, 1993
Marco, 1994
Als geen ander, 1995
De waarheid, 1997
De bestemming, 1998
Luid en duidelijk, 2000
Onderweg (verzameleer), 2002
Zien (album-dvd), 2004
Symphonica in rosso, 2006
Borsato-box (oetgebreide verzameleer, 5 cd's), 2007
Wit licht, 2008
Wit licht live, 2009
Dromen durven delen, 2010
3Dimensies live, 2011
#1 (verzameleer), 2011
Duizend spiegels, 2013
25 jaar Marco Borsato - de studioalbums, 2015
Evenwicht, 2015
Thuis, 2017