Lieke Marsman

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Lieke Marsman (Den Bosch, 25 juli 1990 - Paries, 3 juni 2026) waor 'n Nederlandse diechteres. Vaan 2021 tot 2023 droog ze d'n titel vaan Dichter des Vaderlands.

Leve

Marsman greujde op in Zaltbommel, boe ze 't vwo deeg. Daonao góng ze in Amsterdam filosofie studere, wat ze in 2015 aofrundde.

Häör literair carrièr waor toen al begós. Al in 2009 waor ze goon publicere in De Gids, Tirade.nu en Vrij Nederland. In 2011 waor häören debuutboondel Wat ik mezelf graag voorhoud oetgekoume. Daovaan woorte mie es 3.000 stök vaan verkoch, wat veur e poëziedebuut väöl is. In 2014 volgde d'n opvolger De eerste letter. Oonderwijl deeg ze vaan 2013 tot 2015 ouch redactiewerk veur Tirade.

Mèt de jaore greujde häör reputatie, en astrein woort Marsman ein vaan de bekindste diechters vaan Nederland die oetindelek zelfs de Beststeller 60 zouw hole. Häören oetgever wouw de twie boondels evels neet herdrökke; daorum brach ze ze in 2017 bij 'nen aanderen oetgever same oet in Man met hoed. Datzelfde jaor brach Marsman Het tegenovergestelde van een mens oet, 'nen oongewoene roman boe-in essay en poëzie zien samegekloonke.

In aprèl 2018 kraog Marsman veur 't iers mèt de kaanker te make. In häöre boverögk woort 'nen tumor oontdèk, dee al-evel behandeld kós weure meh häöre rechtererm versjendeleerde. Datzelfde jaor nog versjeen De volgende scan duurt vijf minuten, mèt gediechte euver de krenkde en häör behandeling. Dao-in stoont ouch 't kort essay Hoe gaat het met je? De res vaan häör leve zouw Marsman väöl euver krenkde, doed, relizjie en esoterie goon sjrieve. In 2021 volgde ze Tsead Bruinja op es Diechter vaan 't Vaajerland. Ze publiceerde bij die gelegenheid ouch In mijn mand.

De behandeling tege de kaanker bleek oetindelek neet te wèrke. In juli 2022 móste häöre ganse rechtererm en -sjouwer draof, umtot d'n tumor waor trökgekoume. Wie ze 'ne maond later bij Zomergasten zaot, vertèlde ze oonder mie euver häör krenkde. Oetindelek storf ze hei begin juni 2026 aon. Marsman is oondaanks häör zwoer krenkde ummer blieve sjrieve. Kort nao häören doed versjeen häör lèste beukske, De dichter en de duivel.

Marsman had 'n relatie mèt journalis Simone Peek.

Werk

Wat ik mijzelf graag voorhoud, Van Oorschot, Amsterdam, 2010 (C. Buddingh'-pries 2011, Lucy B. en C.W. van der Hoogtpries 2011 en Liegend Konijn Debuutprijs 2011; genomineerd veur de Jo Peters Poëziepries 2012)
De eerste letter, Van Oorschot, Amsterdam, 2014
Het tegenovergestelde van een mens, Atlas Contact, Amsterdam, 2017
Man met hoed, Atlas Contact, Amsterdam, 2017
De volgende scan duurt vijf minuten, Uitgeverij Pluim, Amsterdam, 2018
- Ingels: The following scan will last five minutes, vertaold door Sophie Collins, Liverpool University Press, Liverpool, 2019
In mijn mand, Pluim, Amsterdam, 2021 (Eline van Haarenpries)
Ter gelegenheid van poëzie, Pluim, Amsterdam, 2023
Op een andere planeet kunnen ze me redden, Pluim, Amsterdam, 2025 (nommer 2 in de Bestseller 60)
De dichter en de duivel, Pluim, Amsterdam, 2026

Extern links

Persoeneleke website