Levant

Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.

De Levant is 'n lanksjtrieëk i ge Midde-Oeëste, aa g'n oeëskus va g'n Middellandse Zieë. 't Weëd begrens durch d'r Taurus i ge noarde en de Syrische en Groeëte Arabische Weuste i ge oeëste. De Sinaï weëd mieëtstes neet tot de Levant gereëkend. Ze besjleet Syrië, Libanon, Jordanië, Israel, Palestina en hieël kling gedeelte va Turkije. Cilicië en Cyprus weëde soms ooch es deel van de sjtrieëk besjouwd.

D'r naam Levant kunt oet 't Latien (levare) en sjteet vuur Morgelank of Lank woe de zón ópkunt. In 't Arabisch gebroek me heivuur ooch waalins 't woad Mashreq, wat ooch letterlich oeëste betekent. Dat topografisch gebeed besjleet evvel ooch Irak en Koeweit.

Same mit Mesopotamië, 't zuudoeëste van Anatolië en 't noardoeëste van Egypte vurmt de Levant 't gebeed wat me d'r Vruchbare Sikkel numt. I 'gn Levant kunt va aodsher terf vuur, wat rónk 7000 v. Chr. tot 't óntsjtoa van d'r lankbouw en doanoa tot touwname van de bevolking hat geleid. Durch höär ligking tusje drei continente floreerde ooch al sjnel d'r handel, neet alling via de Zijderoute, meh ooch via zieë tot aa g'ne Indusvallei deper in Azië.

I g'n Levant woeëne huuj óngeveer 58 mieljoeën luuj. De mieëste kalle Arabisch en e klinger gedeelte ooch Ivriet en Turks. De regio is religieus divers; 't Joededom en christedom zint hei óntsjtange en wiejer gieëf 't hei vöäl minderhede, woe-ónger de druze, alawiete, jezidi's en samaritane. Boete Israel hange de luuj mieëtste luuj geweunlich d'r soennitische islam aa. Christene, mieëtstes orthodox of katholiek, vorme 'n groeëte minderheed in Libanon en historisch gezieë ooch in Israel, Syrië, Palestina en Libanon.