Kroatisch hierevoetbalèlftal

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

't Kroatisch hierevoetbalèlftal vertrejt Kroatië in internationaol voetbalmatche. 't Team weurt gereguleerd door de Kroatische voetbalboond Hrvatski nogometni savez (HNS). 't Èlftal heet in zie kort bestoon e paar aonsprekende successe gehaold.

Historie

Davon Šuker, staarspeuler vaan Kroatië op 't WK vaan 1998.

Kroatië bestoont tösse 1941 en 1945 kort es marionèttestaot vaan nazi-Duitsland. In deen tied had 't zien eige team. Door d'n Oorlog späölde dit team allein vrundsjappeleke matche. Nao 1945 góng Kroatië weer in Joegoslavië op en späölde Kroate in 't Joegoslavisch èlftal.

Ind 1990 woort 'n officieus Kroatisch èlftal samegestèld. 't Land waor op dat memint nog neet oonaofhenkelek en in 't Joegoslavisch èlftal, wat nog bestoont, späölde Kroate gewoen mèt. Naotot Kroatië ziech in 1991 esnog aofsjeide, kós de erkinning beginne. Kroatië woort in 1992 touwgelaote tot de FIFA en in 1993 tot d'n UEFA.

De erkinning vaan 't èlftal kaom zjus te laat veur 't WK vaan 1994, meh aon 't Europees Kampioensjap vaan 1996 moch 't wel mètdoen. Kroatië haolde hei de kwartfinaal. Nog väöl beter góng 't op 't WK vaan 1998. Nao 'n 3-0 wins op Duitsland, e verlees tege Fraankriek en wins op Nederland woort dit klein land daarde.

't Doort laank ietot 't land nog zoeväöl succes haolde. Wel plaotsen 't ziech veur de mieste EK's en WK's; in 2008 kaom 't nog tot de kwartfinaal op 't EK. Hei-in kaom veraandering op 't WK vaan 2018. Gans oonverwach haolde Kroatië de finaal, nao drei verlenginge en twie penantieseries te höbbe euverleef boe-in 't oonder mie vaan Ingeland won. Oetindelek waor in de finaal Fraankriek mèt 4-2 te sterk. Ouch op 't WK vaan 2022 waor 't èlftal bezunder sterk. Nao oonder mie 'n wins op Brazilië in de penanties woort 't team oeteindelek daarde.