Kris De Bruyne

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Kristiaan (Kris) De Bruyne (Antwerpe, 20 miert 1950 - Sint-Amands, 3 fibberwarie 2021) waor 'ne Belzje zenger vaan folk- en cabarètmeziek.

Levesloup

Kris De Bruyne woort gebore es zoon vaan historicus Arthur De Bruyne; heer waor de vijfde oet e gezin vaan zeve. In 1967 traoj 'r op 't op skifflefestival vaan Hove, boe heer opzien baorde mèt 'n bluesversie vaan 't kinderleedsje Klein klein kleutertje. Daankzij Wannes Van de Velde kós heer goon opnumme. Heer góng optrejje mèt 't duo Lamp & Lazerus; es Lamp, Lazerus & Kris naome ze in 1971 oonder mie de single "De Peulschil" op. Naodeen geit heer solo wijer. Heer behaolt 'n aontal (cult)hits die veural in Vlaondere bekind weure. 't Leedsje "Amsterdam" oet 1975 weurt evels ouch in Nederland bekind - veural wie 't (väöl) later in 'n kiesreclaam weurt verwèrk.

Naotot in 1977 zie broor Koen störf (dee ouch zienen arrangeur, pianis en producent is), trèk heer eweg oet 't Belsj en reis heer get roond in de Vereinegde Staote. Bij trökkoms is ziene meneer vaan meziek make in Europa oet de mode geraak. De decennia dao-op bleef heer mie op d'n achtergroond, al haolde heer in 1985 nog wel e klein hitsje mèt "Je suis gaga". Ouch in 1998 deeg 'r vaan ziech spreke, door de samewèrking mèt Thé Lau (vaan The Scene).

De lèste jaore woorte zien leedsjes dèkser door aandere gezoonge, oonder mie door Axelle Red. In 2019 woort De Bruyne gehöldeg in Bornem. Intösse lijde heer al aon de krenkde vaan Alzheimer. 't Lèste jaor vaan zie leve brach 'r door in 't röshoes, boe heer begin 2021 storf.

Werk

Lamp, Lazerus & Kris (Vogue, 1971)
Kris De Bruyne (Vogue, 1973)
Ook voor jou (Vogue, 1975)
Ballerina's (Philips, 1977)
Paprika (Philips, 1979)
Kris De Bruyne Band (CNR, 1985)
Oog in oog (Philips, 1989)
Janssen & Janssens maken een film (EMI, 1990) (filmmeziek vaan Kris De Bruyne en Chris Peeters veur Robbe De Hert)
Keet in de lobby (Alora, 1993)
Mirwart (Alora, 1994)
Van mijlenver over de grens (Alora, 1996)
30 jaar zwervend bestaan (Alora, 1998) (dobbelalbum)
Zakformaat XL N°1 (CNR, 2000) (mèt Patrick Riguelle en Wigbert Van Lierde)
Buiten de wet (Culture Records, 2001)
Westende songs (Krisismusic, 2005) (producent: Jean-Marie Aerts. Speciaol gaste: Patrick Riguelle, Henri Ylen, Filip Casteels en Luc De Vos)
La Matanza songs (Krisismusic, 2011)
In levende lijve (CNR Records, 2016) (dobbelbox mèt speciaol gaste wie Mauro Pawlowski, Jean-Marie Aerts, Klaas De Somer, Patrick Riguelle, Kommil Foo, Clara Cleymans en Neeka)

Compilatiealbums

Portret (2x cd) (Philips, 1980)
Master Serie Kris De Bruyne (Universal)
Master Serie 1972-1979 (Sony)
Wedersamengesteld (Alora, 1993)
17 Best of Kris De Bruyne (EMI)
40 jaar songs (4 cd's, Universal, 2008)
Zo dichtbij (Het beste van) (4 cd's, Universal, 2021)