Krim-Tatare
Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.
Krim-Tatare (Krim-Tataars: къырымтатарлар, qırımtatarlar/къырымлар, qırımlılar) zint 'ne Turkse etnische groep. Ze kalle van aodsher Krim-Tataars en zint groeëtedeels soennitische moslims. Vöäl Krim-Tatare sjpreëke evvel och Russisch, Oekraïens en anger sjproake binne de diaspora.
De Krim-Tatare mótte neet verward weëde mit de Volga-Tatare, Lipka-Tatare, Siberische Tatare en vöäl anger volkere of subgroepe. In 't Róssische Riek woar Tataar 'ne algemene term vuur Turkse islamitische volkere. Genetisch gezieë óngersjeie de Krim-Tatare zich van anger Tatare durch 'n sjterke verwantsjap mit ouw Mediterraanse volkere, los van de tupisje Turks-Mongoolse gene.
In d'r mei va 1944 woeëde de Krim-Tatare sjlachoffer va groeëtsjalige deportaties noa Centraal-Azië, 'n tactiek die Sovjetleider Sjtalin dökker touwpasde op etnische minderhede tiedes zie bewind, zikker tiedes d'r Twieëde Weltkreeg. Heibei sjtorve tieëndoezende, meugelik mieë es 100.000 luuj. Es gevolg van de gedwonge volksverhoezinge besjteet och huuj d'r daag nog 'n groeëte Krim-Tataarse gemeensjap in Oezbekistan (239.000 luuj). Óp g'n Krim, 't lank woe zie vandaan kómme, vörme ze doaenteëge 'n minderheed van zo'n 15% procent van de bevolking (ca. 248.000 luuj). I Roemenië (ca. 24.000) en Turkieje (ca. 150.000) besjtónt och relatief groeëte minderhede. In 't letsgeneumde land zouwe zo'n 5 mieljoeën Turke van Krim-Tataarse aafkóms zieë, döks de noakómmelinge van immigrante oet d'r 19e ieëw.