Calcutta

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Calcutta (Ingels (modern): Kolkata) is 'n stad in India. 't Is de houfstad vannen deilstaot Wès-Bengale. De stad zelf haet zoea 4.580.000 inweuners (2001) enne stejjelike agglomeraasje zoea 13.200.000 inweuners (2001). In 2001 waas 't de op twieë nao grótste stad van 't landj, nao Bombay en Delhi.

Gesjiechte

Tösse 1700 en 1912 waas Calcutta de houfstad vanne Britse kloonje India (daonao woort det Nuuj-Delhi). In dezen tied kwaam de stad pas richtig toet bleuj. Zie haet dore groeate Britsen invlood kwa arsjitektuur 'n hieël wèstersj karakter.

Van 1912 toete ónaafhenkelikheid van India in 1947 waas Calcutta de houfstad vanne veurmaolige Bengale.

Geografie

Calcutta ligk innen delta vanne Ganges, ane reveer de Hooghly. Anen euverkantj vanne Hooghly ligk Haora, de grótste veurstad van Calcutta en döks ouch de twèllingstad van Calcutta geneump.

E groeat deil vanne stad waas oearsprunkelik 'n oetgemaete zómpgebied, det inne loup vanne ieëven is druueggelag wore veur ruumdje te maken ane sterk-greujendje bevölking. 't Nasjenaal park Sundarbans sjèdj 't stejjelik gebied vanne Golf van Bengale, die zoea 154 km te zuje vanne stad ligk.

Gebore in Calcutta

1861-1941 - Rabindranath Tagore, diechter en sjriever (ouch dao gehiemeld)
1921-1992 - Satyajit Ray, film rezjiseur (ouch dao gehiemeld)
1947 - Partha Chatterjee, antropoloog, historicus en polletiekoloog

Trivia

Calcutta wuuert inne vouksmóndj waal gebroek veur 'n óngespecifieerdje plaats humoristisch waer te gaeve, doordet de klemtoean ligk oppe littergreep die klink wie kut.