Kinderporno
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Kinderporno is pornografie boe minderjaorege in seksueel handelinge betrokke zien. Wienie devaan gesproke weurt, geit 't in de regel um pornografie op (al daan neet bewegend) beeld.
De productie vaan kinderporno is euver zoe good wie de ganse wereld verboje. In de mieste gevalle is dat al otomatisch zoe umtot me veur 't make devaan kindermisbruuk moot begoon. Wijer kinne väöl len bijkoumende wètte die 't make vaan kinderporno op ziech verbeeje. Zoe is 't Nederland verboje veur porno mèt zèstien- of zeventienjaorege te make, allewel tot me op dee leeftied volgens de wèt wel seksueel mierderjaoreg is. Pornografische tekste of teikeninge mèt minderjaorege drin kinne wel legaol zien; dat versjèlt per land.
Veural vreuger waor de distributie en 't bezit vaan kinderporno neet euveral verboje. Oonderzeuk heet evels oetgeweze tot 't aonpakke vaan de producente allein de productie vaan kinderporno neet stop. Daorum weurt allewijl mie es vreuger wèrk gemaak vaan de vervolging vaan consumente. Neet allein 't bezitte, ouch 't loere nao kinderporno is in väöl len al verboje. In Nederland steit op kinderporno 'n straof vaan maximaol veer jaor. Daobij weurt formeel gei versjèl gemaak tösse productie, distributie, bezit en einmaolege consumptie.[1] Me kin es maker natuurlek veur 't misbruuk zelf nog 'n hoeger straof kriege.
Vaanajds is kinderporno op de zwarte merret verspreid, dèks in gespecialiseerde netwerke. Mèt de koms vaan 't internèt vint me dees beelder dèks online. In de regel weurt 't aongeboje op 't darkweb. Pedofiele ruile online dèks oonderein bestande mèt kinderporno.