Jurk!

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Wieërts, es te dit dialek sjpriks.

Jeroen van Koningsbrugge (links) en Dennis van de Ven in 2010.

Jurk! is e Nederlands duo in de traditie vaan 't muzikaol cabarèt. 't Besteit oet Jeroen van Koningsbrugge en Dennis van de Ven.

Historie

Braobander Van Koningsbrugge en Dennis van de Ven lierde ziech kinne op de Buunsjaol in Mestreech. Sinds 2000 wèrke ze oonder deze naom same. De naom kump vaan de moojer vaan Van Koningsbrugge, die op e zeker memint afasie kraog. Es gevolg daovaan kós ze mer e paar wäörd zègke, boe-oonder 'jurk', wat ze dèks te oonpas deeg. 't Tragikomisch geveul wat ze daobij kraoge pasde volgens hun goon bij de leedsjes en de sketches die ze maakde. In 2001 debuteerde ze mèt d'n theatershow Bakermat.

Daonao woort 't e tiedsje stèl roond de twie. In 2006 waore ze op de tv te zien, in de programma's Kannibalen en Nieuw dier. Definitief bekind bij e groet pebliek woorte ze door 't satirisch program Draadstaal bij de VPRO, wat vaan 2007 tot 2009 leep. Daonao begóste ze bij de AVRO mèt NeonLetters, e program in dezelfde geis.

Oonderwijl hadde ze evels weer lös gekrege in 't theater, en in 2010 en 2011 leep hun nui veurstèlling Avondjurk. Dit góng gepaard mèt hun ierste album, wat dezelfde naom droog. De single "Zou zo graag" sjoot nao 'ne oproop op Twitter astrein nao de ierste plaots vaan d'n Top 40. Wijer steit op Avondjurk ouch 't leedsje Verrukkelijke leven, e chansonechteg leed mèt 'nen teks in 't Limbörgs. Dit waor veur Rowwen Hèze aonleiing um de samewèrking op te zeuke; same brachte ze 'n nui versie oet boe-in Van de Ven en Jack Poels allebei in hun eige dialek zinge. De twie slote 2011 aof mèt de veurstèlling Kerstjurk.

In 2013 herhaolde ze de combinatie vaan theatertour en album mèt Glitterjurk. 't Jaor drop dege ze korten tied e laataovendprogram veur Radio 538, Jurk!FM. In 2015 kaom Draadstaal eine kier trök op de tv.

Bronne

Dit artikel is gooddeils gebaseerd op 't corresponderend Nederlandstaoleg artikel, en wel in dees versie.

Jurk! op Streektaalzang.nl