Jerry de Jong

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Jerry Murrien de Jong (Paramaribo, 29 augustus 1964 - juni 2026) waor 'ne Surinaoms-Nederlandse voetballer dee es verdeideger späölde.

Leve en loupbaon

De Jong kaom es keend nao Nederland en späölde in de jäög bij ASC SDW oet Amsterdam. In 1982 kaom heer bij AZ '67. 't Jaor dao-op kaom heer bij de selectie vaan 't ierste meh debuteerde heer neet. De Jong góng dao-op nao Telstar (voetbalclub), boe heer wel woort opgestèld en in drei'nhaaf jaor 96 kier späölde. Loupende 't sezoen 1987/88 kaom heer bij sc Heerenveen.

De groete doorbraok kump in 1989, es De Jong 'ne transfer maak nao PSV. PSV is daan de groetste club vaan Nederland en eine vaan de groetste in Europa. De Jong is 'ne zuvere verdeideger dee neet dèks scoort. In 1990 en 1991 späölt 'r ouch drei kier veur 't Nederlands èlftal. Oetindelek zal heer tot 1994 bij PSV blieve, al weurt 'r in 1993 wel oetgeliend aon FC Groningen.

Nao zien carrièr bij PSV geit heer nog e jaor nao SM Caen in Fraankriek, meh es die club nao e jaor degradeert is 'r weer weg. De Jong, 31 noe, wèlt zien carrièr aofbouwe in de Ierste Devisie. Nao twie jaor bij FC Eindhoven te höbbe gespäöld, geit 'r nao MVV. Heer is weerdevol veur 't team en weurt eigelek ummer opgestèld. Aon zien profcarrièr kump in 2001 'n abrup ind. Geplaog door geldnoed es gevolg vaan 'n späölverslaving klajt heer de pinpas vaan zienen teamgenoet Émerson. MVV oontsleit 'm astrein.

Nao dit oontslaag späölt 'r nog vief jaor bij de amateurs vaan SV Panningen. Es speuler vaan 't ierste maak 'r de degradatie (2004) en her-promotie (2005) mèt. In 2007 en 2008 liert 'r door veur welzienswèrker; heer geit aon 't werk es combinatiefunctionaris in 'ne sportsjaol.

In juni 2026 kump 't beriech tot heer op 61-jaorege leeftied is gestorve. 'nen Doedsoerzaak weurt neet gegeve. Jerry de Jong waor de pa vaan Nigel de Jong, dee ouch profvoetballer is gewore.