Jeroen Dijsselbloem
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
.jpg)
Jeroen René Victor Anton Dijsselbloem (Indhove, 29 miert 1966) is 'ne Nederlandse landboew-ikkenoom, polletieker en bestuurder. Heer is lid vaan de PvdA. Heer is sinds 13 september 2022 börgermeister vaan Indhove. Sinds mei 2019 is heer veurzitter vaan de Nederlandse Vereiniging Natuurmonneminte. Ieder waor Dijsselbloem veurzitter vaan de advieskemissie vaan ‘t Nationaol Greuifoonds (2021–2022) en vaan de Nederlandsen Oonderzeuksraod veur Veilegheid (2019–2022), minister vaan Financies (2012–2017), veurzitter vaan d'n Eurogróp en in die weerdegheid ouch veurzitter vaan de Raod vaan Gouvernäörs vaan ‘t Europees Stabiliteitsmechanisme (2013–2018).
Dijsselbloem greujde op in Stratum. Op veer jaor verhojsde heer nao Son. Bis 1985 heet heer ‘n pre-universiteitsopleiing gevolg aon ‘t Eckart College. Heer kump oet ‘n Roems-Kattelieke hoes, mer is zelf neet relizjieus. Ziene pap waor Ingelslieraar en zien mam basissjaollieraar. Heer studeerde vaan 1985 tot 1991 landboew-ikkenemie aon de Universiteit vaan Wageninge, gespecialiseerd in bedriefsikkenemie, landboewbeleid en sociaol-ikkenomische historie. Es oonderdeil vaan zien studies voltoeide heer in 1991 ‘n doctoraol oonderzeuksprojek in zuvel-ikkenemie aon ‘t University College Cork.
Europese Unie
[bewirk | brón bewèrke]Dijsselbloem woort op 5 november 2012 minister vaan Financies in ‘t kabbinèt vaan Rutte II. Vaanaof middel december vaan dat jaor woort ziene naom dèks geneump es kandidaat um Jean-Claude Juncker op te volge es veurzitter vaan de Eurogróp, 't euverlegk tösse de ministers vaan Financies vaan de zevetien Eurolen. Heer waor d'n einsegsen officiële kandidaot dee zich op 18 jannewarie 2013 veursjtèlde en woort beneump op 21 jannewarie 2013. Dijsselbloem woort op 13 juli 2015 opnui verkoze tot veurzitter vaan d'n Eurogróp. Heer moos naomes d'n Eurogróp oonderhandelinge mèt Griekeland oetveure euver de sjöldecrisis.
In ‘n interview mèt de Frankfurter Allgemeine Zeitung in miert 2017, wie heer gevraog woort nao solidariteit tösse de len in de noordeleke en zuideleke eurozone, zag heer:
Es sociaol-democraot vin iech solidariteit zier wiechteg. Mer wee d’r um vraog, heet ouch pliechte. Iech kin mien gans leve neet doorbringe aon draank en vrouwlui allein um daonao miene hand te ophawwe. Dit princiep is vaan touwpassing op persoenlek, lokaol, nationaol en geliek op Europees niveau.
Op 22 miert 2017 vroog de S&D-fractie (de sociaoldemocratische fractie boe-ouch de Nederlandse PvdA, Parti Socialiste (Belsj) en de Sozialdemokratische Partei Deutschlands oonder aandere deil vaan oetmake) häöm in ‘t Europees Parlemint nao e paar controversiëel verklaoringe um oontslaag te numme vaan dees positie. Heer woort op 3 april door ‘t Europees Parlemint veroordeild naotot heer ‘n oetnudeging um deil te numme aon ‘n debat euver Griekeland tiedes de plenaire sessie vaan ‘t Europees Parlement in Straatsburg aofsloog. De Franse christen-democratische Europarlemintariër Alain Lamassoure vroog um Dijsselbloem in alle parlemintsgebouwe tot persona non grata te verklaore.
Börgemeister
[bewirk | brón bewèrke]Op 19 juli 2022 woort bekind gemaak tot Dijsselbloem door 't Kolleesj vaan Indhove waor genomineerd es nuie börgemeister, es opvolger vaan John Jorritsma. Op 2 september vaan dat jaor woort bekind gemaak tot de Raod vaan Ministers had besjlaote um häöm te veurdrage veur benoeming door moyen vaan ‘n keuninklek beslaag, vaanaof 13 september 2022. De inzwering en de installatie voonde ouch plaots op dee daag. Ziene portfolio umvat: publieke orde en veilegheid; touwziech en handhaving (excl. touwziech op ‘t gebeed vaan milieu, geboewe en woeninge); GDPR-touwziech; administratief coördinatie; reprizzentatie, publieke zakes en boetelandse betrèkkinge; internationaol zakes en acquisitie; vergunninge veur eveneminte; juridische zakes (advies, bezwoere, beroep en klachten). Es börgemeister is heer regiobörgemeister vaan de Regionaol Einheid Oos-Braobant, veurzitter vaan de Taskforce Braobant Zieland, veurzitter vaan de Veilegheidsregio Braobant-Zuidoos, veurzitter vaan de Metropoolregio Indhove, veurzitter vaan de Stiechting Brainport en veurzitter vaan RIEC Braobant-Zieland.