Jerney Kaagman
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
_-_TopPop_1973_5.png)
Christina Henriette (Jerney) Kaagman (D'n Haag, 9 juli 1947 - Blaricum, 31 juli 2026) waor 'ne Nederlandse popzangeres en cultureel bestuurder. Ze woort bekind es froontvrouw vaan de band Earth & Fire en brach ouch solowerk oet. In de jaore tachteg góng ze aon 't werk es bestuurster in versjèllende organisaties veur de meziekindustrie, boebij ze ziech dèks voloet oetspraok veur oteursrechte en tegen 't kopiëre vaan meziek. In 2002 woort ze bij 'n nui ginneratie bekind es jurylid in Idols. Nao 2009 kaom ze neet väöl in 't opebaar.
Leve
[bewirk | brón bewèrke]Kaagman woort gebore in D'n Haag. Op de mms, die ze volgde aon 't Huygenslyceum in Voorburg, zong ze in 't sjaolkoer. Daonao deeg ze de sekreteresse-opleiing.
In 1969, wie de beatcultuur in D'n Haag op zien hoegdepunt stoont, góng 't hel. Ze woort gevraog veur de band Earth & Fire roond de breurs Chris en Gerard Koerts. De band had astrein 'nen hit mèt "Seasons" (gesjreve door George Kooymans). Tegeliek zong ze ouch in de supergróp Holland, die optrooj in 't tv-program Beat behind the dikes.
In de jaore die volgde, had Earth & Fire versjèllende hits, boevaan 2 op nommer ein ("Memories" in 1972 en "Weekend" in 1979). Kaagman waor heibij de blikvaangster. Ze leep dèks in strakke pekskes; veural bekind woort 't metaoleg blauw pekske wat ze zong wie de band in Toppop "Weekend" oetveurde. Naotot de band in 1983 oeterein góng, maakde Kaagman nog twie soloalbums, die neet euverdreve väöl succes hadde. Sinds 1974 waor Kaagman same mèt Bert Ruiter, bassis vaan de band.
In 1983 maakde ze ouch häör imago es sekssymbool woer door 't ierste naaksmedel voor de Nederlandse Playboy te weure. Later poseerde nog naaks veur concurrent Penthouse.
In 1987 stopde Kaagman mèt actief meziek make en góng ze de bestuurswereld in. Ze woort veurzitster vaan de muzikantevakboond BVPop. Ouch góng ze aon 't werk es pr-vrouw bij Radio Noordzee. In 2000 woort ze veurzitster vaan de Stiechting Conamus (allewijl Stiechting Buma Cultuur), 'n organisatie veur de belaange vaan de meziekindustrie. Hei-in spraok ze ziech dèks oet tegen 't kopiëre en downloade vaan meziek.
Vaanaof 2002 kaom ze trök in 't midde vaan de publiciteit, en wel es jurylid vaan de talentejach Idols op RTL4. Ze trok de aondach mèt häör dèks venijneg commentair op kandidaote. Häör oetspraoke maakde häör wieneg geleef bij de tv-kiekers, die in 't gemein voonte tot ze oonzeker lui aofbrende veur de kiekciefers. Ouch woort häör verwete tot ze, door gebruuk vaan facelifs, es viefteger nog ummer häör imago vaan sekssymbool perbeerde vas te hawwe. Kaagmaan bleef oetindelek tot 2008 bij 't program.
In 2009 naom Kaagman aofsjeid es veurzitster vaan de Conamus. Nao dat pensioen kaom ze neet väöl mie in de publiciteit. Wel vertèlde ze in 2012 in 'n interview tot ze de krenkde vaan Parkinson had. Ze voont 't belaankriek veur daoveur oet te koume. In 2022 storf häöre maan. Oondaanks alle fysiek oongereef bleef ze tot häören doed in 2006 toes woene.
Discografie
[bewirk | brón bewèrke]Nota bene: allein 't solowerk is opgenome.
Albums
[bewirk | brón bewèrke]- Made on earth, 1984
- Run, 1987
Singles
[bewirk | brón bewèrke]- 1984 - "Allright, here I am"/"Willow tree" (22 in de Top 40)
- 1984 - "I will love you endlessly"/"Misery"
- 1984 - "My mystery man"/"Misery" (tipparaad)
- 1985 - "I'll take it"/"Misery"
- 1986 - "Victim of the night"/"Theme from V.O.N."
- 1987 - "Running away from love"/"Dance to the music"
- 1988 - "Queen of hearts"/"You've got to believe"
- 1988 - "Don't say it"/"I don't wanna talk about it”