Jean Rey
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
.jpg)
Jean Max Georges Rey (Luuk, 15 juli 1902 – aldao, 19 mei 1983) waor 'ne Belzje advecaot en liberaole politicus. Heer waor Belsj parlemintslid, minister, Europees Kemissaris, Europees Parlemintslid en d'n Twiede President vaan de Europees Kemissie.
Jean Rey woort gebore in 'n Waolse prottestante femilie. Ziene pap, Arnold Rey (1867-1940), aofkomsteg oet Zweitserland, waor minister. Wijers waor heer 'ne kleinzoon vaan Léon Gérard, industrieel, börgemeister vaan Luuk en Belsj parlementslid.
Heer trouwde mit Françoise Gevers, die in 1946 ging hiemele. Ze krege drei dochters en eine zoon. Heer trouwde later mèt Suzanne Ledent, weduwe vaan de Luukse advecaot Paul Brouha, dee in 1943 door de Duutsers woort neergesjote.
Heer behaolde zien doctoraot in de Rechte (1926) aon de Universiteit vaan Luuk en vestigde ziech es advecaot in Luuk. Heer naom deil aon de Achtiendaogse Veldtoch en tiejes de Twiede Wereldoorlog woort heer es Duutse kriegsgevangene vasgehawwe.
In 1935 woort Rey verkoze tot gemeinteleke raodslid in Luuk en in 1939 tot liberaol parlemintslid veur 't Arrendissement Luuk 'n mandaot wat heer tot 1958 bezat. Vaan augustus 1949 tot april 1950 waor heer minister vaan Weerbouw in de regering vaan premier Gaston Eyskens. Vaan april 1954 tot jannewarie 1958 waor heer minister vaan ikkenomische zake in de veerde regering vaan Achille Van Acker. In deze rol waor heer nauw betrokke bij de opriechting vaan de Europese Ikkenomische Gemeinsjap. Heer waor 'ne euvertuigde veurstender vaan 'n wiedreikende fiddarlisering vaan 't Belsj. Heer waor, same mit Julien Lahaut, oonder andere, eine vaan de autäörs vaan e Veurstel veur de herziening vaan de Constitutie wat op 25 miert 1947 woort ingedeend aon 't Belsj Parlemint. In 't ierste artikel vaan de veurgestèlde nui groondwèt woort Belsj gedefinieerd es 'n “Confederatie gevörmp door twie regionaol Staote, Vlaondere en Wallonië, en de Fidderaol Stad vaan Breusel".
In 1955-1957 waor Rey veurzitter vaan de Speciale Raod vaan Ministers (de latere Raod vaan de Europese Unie) vaan de Europese Koel- en Staolgemeinsjap. In 1958 woort heer Belzje Eurokemissaris (verantweurdelek veur boetelandse betrèkkinge) in de Commissie vaan de Europese Ikkenomische Gemeinsjap oonder d'n ierste President vaan de Europees Kemissie, Walter Hallstein. Vaan 1967 tot 1970 waor heer d'n Twiede President vaan de Europees Kemissie en d'n ierste President dee de leiing naom euver de Europees Kemissie wie die de otoriteit waor gewore vaan de drei samegevoogde Europese instèllinge (Europese Ikennomische Gemeinsjap, Europese Gemeinsjap en Kole en Staole en Euratom). Es president vergroetde heer de bevoogheie vaan 't Europees Parlemint en pleitde heer veur direkde verkezinge veur deze instèlling. Heer naom ouch 't touwziech op ziech bij de opriechting vaan de Europese Douane-unie in 1968.
Rey heet ouch de persdeens vaan de Kemissie opgeriech en heet bijgedrage aon de bevordering vaan Europese studies. Heer waor ouch docent aon 't Institut d’études européennes, opgeriech in 1963 aon de Université libre de Bruxelles. Vaan 1964 tot 1974 waor heer veurzitter vaan de Raod vaan Bestuur vaan 't Europees Kolleesj in Brögke.