Jaobik

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Jaobiks, es te dit dialek sjpriks.

---

Jaobik (Jabeek) Gewaeze gemeinte in Nederlandj
Gevörmp	1796
Opgehaeve	1982
Opgegange in	Óngerbenk
Provincie	Nederlands Limburg
Hoofplaats	Jaobik
Opperflaakde (bie opluffing)	3,98 km²
– daovan water:	verwaorloesbaar km²
Inwoeners (kort veur opluffing)	645
– deechde:	162/km²
Lies van börgemeisters

Jaobik mèt de Gertrudiskèrk

Jaobik (ouch gesjpeld es Joabik, Nederlands: Jabeek) ies 'n dörpke in de gemeinte Baekdale in Nederlands Limburg. Jaobik ies bies de herindeiling van 1982 lang de kleinste gemeinte van Nederland nao oppervlaakde gewaes, en ouch ein van de kleinere nao aantal inweunersj. 't Dörp haet óngevaer 800 inweunersj (2006). Bie de gemeinte Jaobik huèrde ouch 't gehöch Ieëtselder (Etzenrade).

Liegking

Jaobik liek vlak bie de grens mèt Duutsjland, t'n noordweste van Sjilvend. Veur versjillende veurzeninge ies Jaobik aangeweze op 't dörp Zösterzeel, sjuus euver de grens.

In de buurt van Jaobik liegke de Jaobikse bösje (Jabeekse bossen), die beheerd were door Natuurmonumenten en die populair zint es wandel- en fietsgebeed.

Historie

't Dörp Jaobik weurt veur 't ièrsj vermeld in 1144, me sjreef doe apud Iabeche. In 1268 sjtóng d'r al 'n kapel. 'n Zelfsjtendige parochie woort 't in de 16e ièw. Van de 17e bies 't miedde van de 20e ièw waor Jaobik 'n baevaartplaats veur de heilige Gertrudis; allewiel ies van dees verièring nog mer wiènig euvergebleve. De heilige sjtóng ouch op 't wape van de gemeinte Jaobik.

Historische inweuneraantalle

Jaobik waor in de neugetiènde ièw e kwakkelend dörp wat ièder inweunersj verlaor es won. Tösje 1909 en 1920 greujde de gemeinte effe hel (taege 't greujciefer van de ganse provincie aan), um daonao weer te stagnere.

Jaor Aantal Greuj (gans Limburg) 1830 428 -- 1840 435 +1,6% (+5,6%) 1849 431 -0,9% (+4,3%) 1859 403 -6,5% (+4,4%) 1869 440 +9,2% (+4,5%) 1879 399 -9,3% (+7,0%) 1889 428 +7,3% (+6,8%) 1899 417 -2,6% (+10,2%)

Jaor Aantal Greuj (gans Limburg) 1909 397 -4,8% (+17,8%) 1920 511 +28,7% (+32,6%) 1930 613 +20,0% (+25,1%) 1947 628 +2,4% (+24,2%) 1956 635 +1,1% (+27,3%) 1960 668 +5,2% (+7,4%) 1971 645 ca. -3,4% (+13,9%)

Opmerking

• In 1971 woorte de inweunertalle op ganse vieftalle aafgerónd. Gelèt op 't klein aantal inweunersj van Jaobik klop 't greujciefer veur dat jaor mesjiens neet exak.

Rillatief óntwikkeling van 1830 tot 1971

(v₁₈₃₀=100)

Greun: Gemeinte Jaobik
Blauw: Provincie Limburg

Insignes

---

De volgende sectie van dit artikel is gesjreve in 't Mestreechs.

---

Op 9 mei 1889 kraog Jaobik vaan d'n Hoege Raod vaan Adel e waope touwgekind, wat ziech zoe liet umsjrieve:

Gedeild: rechs (veur de beziener links) in keel (roed) e slangekopkruus vaan zèlver mèt e hartsjèld vaan zèlver, belaoje mèt drei keuk vaan keel, gezat 2 en 1; links (veur de beziener rechs) in goud de H. Geerte vaan Nijvel, de kop umgeve door 'ne nimbus, dragend 't abdissekleid vaan sabel (zwart), geziech en han vaan natuurleke kleur, hawwend in de linkerhand 'ne kroompstaaf vaan goud, boetege achterein opklummend drei muuskes vaan zèlver, de kromming vaan de staaf vaan sabel.

Dit is e waope wie 't 'rs talloes gief in de umggeving. De H. Geetrui is de parochieheilege vaan Jaobik, 't slangekopkruus is 't waope vaan de hiere vaan Awstroa, die oets euver groete deile vaan 't Heuvelland heersde.

Bezeenswaerdighede

De kèrk van Jaobik ies gewiejd aan Gertrudis. 't Neogotisch geboew woort óntworpe door P.J.H. Cuypers en dateert van 1858. 't Ies 'n driebeukige basilica van baksjtein. De tore ies van 'n ièrder kèrk en dateert oet de 15e ièw. In de kèrk bevink ziech 'n houte beeld van Gertrudis oet de 17e ièw.

In Jaobik liegke versjillende besjermde carréhäöf. Sómmige daovan zint door e gangesjtèlsel mètein verbónge. In d'n tied van de Bokkeriejersj koes me zoa nao ein vlöchte.

Dörpsvereiniginge

• Fanfaar St. Caecilia (1906)
• Vootbalvereiniging Jaobik