JD Vance
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
JD Vance (gebore James Donald Bowman; Middletown in Ohio, 2 augustus 1984) is 'nen Amerikaanse sjriever, risico-investeerder en polletieker vaan de Rippeblikeinse partij. Heer is d'n allewijle vicepresident vaan de Vereinegde Staote, oonder president Donald J. Trump.
Vance woort bekind mit ziene memoir oet 2016, Hillbilly Elegy: A Memoir of a Family and Culture in Crisis. Zien book verkint zien opvoojing in Middletown, Ohio, en de Appalachiaanse weerdes vaan zien femilie oet Kentucky, boebij heer leech werp op de sociaal-ikkenomische oetdaginge boemèt witte Amerikaanse arbeidersklasses te kampe höbbe.
In 't begin waor Vance 'ne vocaole criticus vaan Donald Trump tijes de presidentiëel verkezinge vaan 2016, en besjreef häöm es “sjaojelek” en es iemes dee “de witte arbeidersklasse nao 'ne bezunder duustere plek” leit. Heer verwees ouch nao zichzelf es 'ne “never-Trump-man” ('ne rechs-conservatief dee, oondaanks zien affiliteit mèt Trump zien partij, noets Trump zou steune). Vance zien standpunt tegeneuver Trump is evels in de loup vaan d'n tied geëvolueerd. In 2021 erkinde heer zien iedere misvattinge in 't openbaar en drökde heer zien steun oet veur Trump zien beleid, en zag tot heer geluifde dat Trump "eine vaan de wienege polletieke leiers in Amerika" is dee de frustratie erkint dee in groete deile vaan erm staote, wie Ohio, Pennsylvania en Kentucky, besteit. Dit culmineerde in Vance zien selectie es Trump ziene vice-presidentskandidaot veur de presidentiëel verkezinge vaan 2024.
Vance heet väöl affiniteit mèt rechs-nationalisme, conservatisme, populisme en posliberalisme. Heer is contra 't homohouwelek, abortus en strenger wapewètte. Daoneve is heer 'ne criticus vaan bewöste kinderloesheid en zeet daobij ziech geïnspireerd te veule door Kattelieke theologie.