Hoonkbal

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Hoonkbal (lienvertaoling vaan 't Ingelse baseball) is 'ne sport mèt bal en slaaghout. De sport kump oet de Vereinegde Staote en is dao roond 't midde vaan de negentienden iew gecodificeerd. Ziene wortele ligke evels wijer trök; speule die sterk op hoonkbal liekene, wie slaagbal en 't get wijer verwant cricket, weure vaanajds al in Europa gespäöld.

Bij hoonkbal gief 't veer hoonke, die op de heuk vaan e bij benaodering veerkenteg veld weure gezat. De bal is klein en hel; geslage weurt mèt 'ne klöppel (en neet mèt e plenkske). Wie bij verwante sporte speule twie teams, die verdeild zien in 'n slaag- en 'n veldpartij. De werper (pitcher) goejt de bal op de slaagmaan aof, dee 'm moot probere eweg te sloon. Is de bal eweggeslage, daan moot de slaagmaan zoe väöl meugelek hoonke aofloupe ietot de bal weurt trökgebrach. Pak heer ze alle veer in eine kier, daan sprik me vaan 'nen homerun (dit lievert 'n extra punt op); blijf heer op ein vaan de aander hoonke achter, daan zal 'r perbere in de slaagbeurte vaan volgende speulers de runde oet te loupe. Me is oet: a) es me nog neet op 'n hoonk is bij 't trökbringe vaan de bal; b) es me bij 't loupe nao 'n hoonk door 'ne veldspeuler mèt de bal weurt aongetik; c) bij 'ne vangbal vaan de veldpartij of d) es me drei kier missleit. Heet de werper neet reglemintair gegoejd, daan weurt 't de slaagmaan neet es misser aongerekend. 'n Wijer regel is tot me neet mèt mie es eine op 'n hoonk maag stoon. Zien alle slaagmaander oet, daan indeg 'nen inning. In totaol gief 't nege innings; 't team wat begint heet dus eine mie.

De sport weurt euver de ganse wereld gespäöld, meh is veural populair in de Vereinegde Staote (boe 't, veural oonder de blaanke bevolking, es de nationaole sport gelt) zoewie in 't Caribisch gebeed en Venezuela. D'n hoonkbalpatsj weurt alum gedrage, dèks ouch door lui die wijer niks mèt de sport höbbe.