Heileg Hart
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
't Heileg Hart, voloet 't Allerheilegste Hart vaan Zjezeke (Latien: Cor Jesu sacratissimum) is 'n belaankrieke devotie, boe-in Zjezeke weurt verierd es symbool vaan God zien oonbegrensde en gepassioneerde leefde veur de minsheid. De devotie weurt veural beleje in de Roems-Kathelieke Kèrk; daoneve is ze ouch vaan belaank bij sommege anglicaone en orthodoxe vaan de westerse ritus. De fiesdaag vaan 't Heileg Hart is op de daarde vriedag nao Pinkstere.
De devotie oontstoont in de hoeg middeliewe en liekent te zien geïnspireerd op de (wereldleke) leefdespoëzie vaan de troubadours. De kèrk waor väöl traon gelege um deze cultus in kèrkeleke devotie um te buige. Me vint de cultus daan nog veural in de kloesterordes, beveurbeeld in de mystiek vaan Bernard vaan Clervaux en Franciscus vaan Assisi. Ouch väöl vrouweleke mystici hele ziech demèt bezeg, wie Lutgard, Mechteld en Gertrud, hele ziech intens demèt bezeg. Later weurt 't ouch belaankriek bij de jezuïete en, daankzij 't invloodriek werk vaan Margaretha Maria Alacoque, ouch bij de nonne vaan de Orde vaan Maria-Visitatie. Alacoque gief de devotie op 'n beslissende meneer vörm; väöl vaan wie ze allewijl weurt beoefend kump vaan häör.
In de negentiende iew woort de Heileg Hart-cultus ouch boete de kloesterwereld belaankriek. Dit waor veural 't werk vaan de Duitse zöster Maria Droste zu Vischering. Zij inspireerde paus Leo XIII um in zien encycliek Annum sacrum de wereld mystiek aon 't Heileg Hart te wije. Sinds dezen tied vint me in väöl kèrke en bij väöl leke toes printsjes en beelder vaan 't Heileg Hart. In 't gemein weure die conventioneel en gestileerd gemaak; e veurbeeld zuut me heineve.