Naar inhoud springen

Golden Earring

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Golden Earring in TopPop, anno 1974.

Golden Earring, tot 1969 bekind es The Golden Earrings, waor 'ne Nederlandse rockband oet D'n Haag. De band bestoont oet Barry Hay (zaank, fluit, saxofoon, slaaggitaar), George Kooymans (gitaar, zaank), Rinus Gerritsen (basgitaar, tósje) en Cesar Zuiderwijk (drums). De band begós begin jaore zèsteg es e sjaolbandsje wat populair leedsjes coverde, meh woort in 1965, nog zoonder Barry Hay, lendelek bekind mèt beatmeziek. In de jaore denao oontwikkelde ze ziech tot 'ne rockband in 't spoor vaan de Rolling Stones en hole ze hit nao hit, dèks op nummer ein. De band greujt oet tot de groetste vaan Nederland; ouch in 't boeteland bouwe ze 'n ripputatie op. De band geit jaoreaank door en bringk nog mèt regelmaot albums oet, meh stop begin 2021 es George Kooymans oongeneselek kraank weurt.

Begin

[bewirk | brón bewèrke]

De band weurt in 1961 opgeriech door veer sjaolvrun aon de De La Reyweg in de Haagse volksbuurt Transvaalkwartier. De band besteit daan oet Rinus Gerritsen, George Kooymans, Hans van Herwerden (gitaar) en Fred van Hilst (drums). D'n oersprunkeleke naom is The Tornado's (sic), en 't rippertoir besteit oet instrumentaol nommers vaan bands wie The Shadows en The Ventures; meziek dee daan in de mode is. Es de Britse band Tornados bekind weurt mèt zienen hit Telstar, moot 'ne nuie naom weure bedach: dat weurt The Golden Earrings, nao e leedsje vaan Peggy Lee. Hans van Herwerden stop in 1963 veur Peter de Ronde. Wijer krijg de band noe ouch 'ne zenger: Frans Krassenburg. Dat kump umtot in Ingeland de beat en d'n èllentrikke blues populair weure, en meziek mèt zaank dus weer in de mode kump. In 1964 weurt drummer Fred van der Hilst ouch vervaange, door Jaap Eggermont.

In de loup vaan 1963 en 1964 bouwt de band ziech 'n gooj liveripputatie op in D'n Haag en umgeving. Nao e konzèr in Scheveningen weure ze aongesproke door Freddy Haayen vaan Polydor, dee e platecontrak veur ze regelt. In september 1965 kump d'n ierste single, "Please go", d'n Top 40 in (hoegste notering: 10). D'n opvolger "That day" weurt in Londe opgenome en haolt zelfs de twiede plaots. Allebei de singles stoon op de debuutplaat Just Earrings.

Door de veranderende meziekmodes stap twiede gitaris Peter de Ronde oet de band. Heer späölt neet mèt op d'n opvolger, Winter harvest, dee in 1967 versjijnt. Kort nao de opnaomes weurt zenger Frans Krassenburg vervaange door de väöl beter zingende (en daobij twietaoleg Nederlands-Ingelse) Barry Hay, dee tot daan touw bij The Haigs had gezoonge.

Greuj nao wereldwij bekindheid

[bewirk | brón bewèrke]

Wie wel mie bands in dezen tied goon de Golden Earrings ind jaore zèsteg ouch experimentere mèt de psychedelica. Dat huurt me al in Miracle mirror oet 1968 (boe-op ouch "Ding-dong-di-ki-di-gi-dong" steit, d'n ierste nommereinhit vaan de band), meh weurt nog dujeleker in 't dobbelalbum On the double oet 't jaor dao-op. Hei-op huurt me ouch al e begin vaan d'n hardrockinvlood dee later belaankrieker zal weure.

In 't jaor 1969 verandert de band ouch vaan naom. D'n awwe naom, dee rappeleert aon 't begin vaan de jaore zèsteg, weurt versumpeld tot 't inkelvoud. Die verandering kump tegeliek mèt 't wissele vaan drummer: Jaap Eggermont weurt producer, en in zien plaots kump Sieb Warner van The Motions. In de nui bezètting en mèt de nuie naom maak Golden Earring de plaat Eight miles high, 'n ech psychedelica-album. Heimèt geit de band ouch veur 't iers op tournee nao de Vereinegde Staote. Nao dezen toer weurt Warner oet de band gezat en vervaange door Cesar Zuiderwijk, veurheer drummer bij oonbekind gebleve Haagse beat-/rockbandsjes.

In wat de definitieve samestèlling zouw zien maak de band in 1970 zien titelloos album Golden Earring. Hei-op stoon veural leedsjes in de klassieke rockstijl, boe-oonder de nommereinhit Back Home. De volgende jaore koume nog e paar albums in dee geis, mèt diverse hits. Ze toere die jaore dèkser de wereld euver, es veurprogram vaan 't stilistisch verwant The Who. Dat alles bringk ze in 1973 't klassiek gewore album Moontan, boe ouch hunne groetsten hit "Radar love" op steit.

Crisis en nui huugdepunte

[bewirk | brón bewèrke]

De jaore daonao perbeert de band op de progressieve toer te goon. Ze hure Robert-Jan Stips vaan Supersister es tósjenis in, meh de albums Switch en To the hilt hole gein groete successe. Daonao perbeert de band 't mèt e bluesgeriech geluid en kump slidegitaris Eelco Gelling (vaan Cuby & the Blizzards) bij de band. Ouch heer weurt weer droetgezat um intern versjèlle, meh is wel te hure op Contraband (1976) en 't konzèralbum Live (1977).

Ind jaore zeventeg zit de band zoewel artistiek es financieel en persoenelek in zwoer tije. Me dink traon um te stoppe, meh hunne manager Freddy Haayen vreug ze daan nog eine kier 'n album te make. Dit weurt Cut (1982), mèt de nommereinhit "Twilight zone". Cut is zoe good en succesvol - "Twilight zone" weurt zelfs, wie "Radar love" jaore daoveur, 'nen hit in de VS - tot de band wèlt doorgoon. Ouch d'n opvolger N.E.W.S. (oet 1984) deit 't good. De single "When the lady smiles" kump in Nederland ouch weer op nommer 1, meh deit neet väöl in Amerika umtot me dao vèlt euver de videoclip vaan Dick Maas.

In de jaore daonao geit de band weer op zeuk. De albums die volge zörge neet veur gooj recensies of groete hits. Wel weurt, in de geis vaan de tied, in 1986 e moonsterkonzèr gegeve op 't strand vaan Scheveningen, boe 200.000 lui bij zien. In 1989, op Parkpop, speule ze zelfs veur 300.000 lui. Dat jaor koume ouch twie verzamel-cd's oet, boe de verkoupciefers vaan tuine tot me de band nog neet is vergete. De plaat Keeper of the flame experimenteert mèt synthipop nao de mode vaan de jaore tachteg, meh vèlt neet good bij de fans. Beter weurt The naked truth oet 1992 oontvaange, boe-op de band zien songs akoestisch oetveurt in 'nen Amsterdamse kaffee. Dat jaor bringk ouch Haags(ch)e Bluf vaan Pieter Franssen, 't ierste book euver de band.

Lèste jaore

[bewirk | brón bewèrke]

Vaanaof de jaore negenteg heet de band gein ambities mie um 't te make in 't boeteland, meh in Nederland zit de sleet nog neet drop. In 1995 späölt de band nog ins op Parkpop, noe zelfs veur 400.000 bezeukers. Face it (1994) bringk veural rock in awwe stijl, dewijl Love sweet besteit oet covers vaan hun helde oet de jaore zèsteg. De verkoup vaan hun plate begint evels wel trök te loupe; Golden Earring haolt zien inkomste ummer mie oet livekonzèrs. Zoedoende weurt 't succes vaan The Naked Truth mèt Naked II (1997) nog ins naogejaog. In 1997 speule Barry Hay en George Kooymans ouch 'ne groete rol bij de doorbraak vaan hun stadsgenoet Anouk: veur häör debuut sjrieve ze e hemfelke klassieke rocksongs.

In 2000 nump de band e gepland jaor rös, wat versjèllende leie ouch d'n tied gief veur soloperjekte. Me indeg 't jaor daoveur mèt Last blast of the century, 'ne live-dobbel-cd, en mèt de cd-box The devil made us do it. Aon allebei vèlt op tot väöl oonbekind materiaol drop steit. In 2003 kump de band trök mèt Millbrook U.S.A., geneump nao 't dörpke bij New York boe väöl bands hun plate opnaome. Mèt Naked III kump in 2005 de lèste akoestische liveplaat oet. Hun volgende album - 't lèste - kump in 2012 en hèt Tits 'n ass. Oondaanks de naom weurt de plaat good oontvaange.

In 't decennium wat volg treujt de band nog dèks live op. Nui materiaol kump evels allein nog vaan soloprojekte of samewèrkinge. Al in 2008 maak Barry Hay 'n swingplaat mèt de Metropolo Big Band (The Big Band theory). In 2016 begint George Kooymans, same mèt Boudewijn de Groot en Henny Vrienten (vaan Doe Maar) de supergróp Vreemde Kostgangers. Deze band maak in totaol drei plate en deit ouch 'nen theatertour.

Aon de band kump sebiet 'n ind es Kooymans aon ALS bliek te lije. De oongeneseleke spierkrenkde maak 't ummer lesteger veur häöm um nog gitaar te speule. De band wèlt neet zoonder häöm wijer goon. Umtot Kooymans de diagnose oontvingk in d'n tied vaan de COVID-19-pandemie, is 'n aofsjeidskonzèr neet meugelek. In fibberwarie 2021, mèt Kooymans ummer kraanker en nog gein ind aon de beperkinge in ziech, beslut de band per direk oet te sjeie.[1] Kooymans störf oetindelek in juli 2025. Golden Earring späölt nog ein aofsjeidskonzèr op 30 jannewarie 2026, in de Rotterdamse evenemintehal Ahoy. Heibij traoje ze op mèt diverse aander bands en musici oet Nederland.[2]

Discografie

[bewirk | brón bewèrke]

Albums

[bewirk | brón bewèrke]
  • Just Earrings (1965)
  • Winter-harvest (1967)
  • Miracle mirror (1968)
  • On the double (1969)
  • Eight miles high (1969)
  • Golden Earring (1970)
  • Seven tears (1971)
  • Together (1972)
  • Moontan (1973)
  • Switch (1975)
  • To the hilt (1976)
  • Contraband (1976)
  • Live (1977)
  • Grab it for a second (1978)
  • No promises,... no debts (1979)
  • Prisoner of the night (1980)
  • 2nd live (1981)
  • Cut (1982)
  • N.E.W.S. (1984)
  • Something heavy going on (1984)
  • The hole (1986)
  • The very best of vol. 1 1965-1976 (1988)
  • The very best of vol. 2 1986-1989 (1989)
  • Keeper of the flame (1989)
  • Bloody Buccaneers (1991)
  • The naked truth (1992)
  • Face it (1994)
  • Love sweat (1995)
  • Naked II (1997)
  • Paradise in distress (1999)
  • Last blast of the century (2000)
  • The devil made us do it - 35 years (2000)
  • The continuing story of Radar Love (2001)
  • Millbrook U.S.A. (2003)
  • Naked III (2005)
  • Collected (2009)
  • Tits 'n ass (2012)

Singles

[bewirk | brón bewèrke]

Allein hits zien opgenome; notering in de Nederlandse Single Top 50 tösse häökskes.

  • "Please go" (10)
  • "That day" (2)
  • "If you leave me" (9)
  • "Daddy buy me a girl" (12)
  • "Don't run too far" (14)
  • "In my house" (10)
  • "Sound of a screaming day" (4)
  • "Together we live, together we love" (6)
  • "I've just lost somebody" (7)
  • "Dong-dong-di-ki-di-gi-dong" (1)
  • "Just a little bit of peace in my heart" (2)
  • "Where will I be" (7)
  • "Another 45 miles" (3)
  • "Back home" (1)
  • "Holy holy life" (5)
  • "She flies on strange wings" (4)
  • "Buddy Joe" (4)
  • "Stand by me" (10)
  • "Radar love" (1)
  • "Instant poetry" (3)
  • "Ce soir" (5)
  • "Sleepwalking" (5)
  • "Bombay" (7)
  • "Just like Vince Taylor / Radar love (live)" (30)
  • "Movin' down life" (27)
  • "Weekend love" (3)
  • "I do rock 'n' roll" (29)
  • "Long blond animal" (19)
  • "Twilight zone" (1)
  • "The devil made me do it" (16)
  • "When the lady smiles" (1)
  • "Clear night, moonlight" (11)
  • "Something heavy going on" (33)
  • "Quiet eyes" (9)
  • "My killer my shadow" (24)
  • "Turn the world around" (10)
  • "Going to the run" (3)
  • "Temporary madness" (26)
  • "I can't sleep without you" (21)
  • "Another 45 miles" (25)
  • "Long blond animal" (30)
  • "As long as the wind blows" (30)
  • "Hold me now" (12)
  • "Johnny make believe" (43)
  • "Burning stuntman" (26)
  • "Paradise in distress" (29)
  • "Albino moon" (16)
  • "A sound I never heard" (50)
  • "I've just lost somebody" (9)
  • "Angel" (35)

Bronne

[bewirk | brón bewèrke]

Dit artikel is gooddeils gebaseerd op 't lemma "Golden Earring" oet Frans Steensma c.s. (redd.), OOR's Pop-Encyclopedie 2014, Editie 19. Argo Special Media BV, Amsterdam, 2013: pp. 231-2

Rifferenties

[bewirk | brón bewèrke]
  1. ↑ AD.nl - Ziekte George Kooymans betekent einde van Golden Earring: ‘Dit is een doodsklap’
  2. ↑ Nu.nl - Golden Earring neemt met brok in keel afscheid: 'This is our last goodbye'
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Golden_Earring&oldid=485653"