Gerry & The Pacemakers
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Gerry & The Pacemakers waor 'ne rockband oet Liverpool, dee vaan 1956 tot 1966 actief waor. De band waor vaan groet belaank in de oontwikkeling vaan de Merseybeat, en waor in zien bèste daog zeker zoe bekind wie de Beatles. Allewijl kint me ze veural vaan hun versie vaan 't musicalnommer "You'll never walk alone", wat väöl bij sportmatche weurt gedrejd en ouch dèks op oetvaarte e.d. te hure is.
De band bestoont in zien bekindste samestèlling oet zenger en bandleier Gerry Marsden, begeleid door Fred Marsden, Les Chadwick en Les Maguire (dee in 1961 bij de band kaom). De oersprunkeleke naom waor Gerry and the Mars Bars; in 1959 móste ze dat nao klachte vaan de firma Mars veraandere. Brian Epstein deeg ze teikene bij Columbia Records, boenao ze in 1963 diverse singles opnaome die door George Martin woorte geproduceerd. Hun ierste drei singles, "How do you do it?", "I like it" en "You'll never walk alone", haolde dat jaor alle drei nommer ein in de Britse hitparaad, 'n prestatie die pas twinteg jaor later door Frankie Goes To Hollywood zouw weure naogedoon. In 't boeteland waore ze neet zoe succesvol, meh ouch dao lete hun leedsjes vaan ziech spreke. Alles biejein woorte ze de twiede succesvolste Merseybeatband nao de Beatles.
Hun leedsje "Don't let the sun catch you crying" haolde in 1964 veural in de VS väöl succes. Begin 1965 woorte ze ouch de stare in hunnen eige film Ferry cross the Mersey, boe Gerry Marsden de soundtrack veur sjreef. Toch zakde de belaankstèlling veur hun werk in, umtot ze in de sjeem vaan de Beatles kaome te stoon. In 1966 lufde de band ziech tijelek op.
Sindsdeen kierde Gerry en de Pacemakers vaan tied tot tied trök. Hun leedsje "You'll never walk alone" waor klassiek gewore umtot 't door de supporters vaan Liverpool F.C. waor touwgeëigend (opmerkelek, umtot Gerry Marsden zelf supporter vaan Everton waor). Nao d'n Hillsboroughramp vaan 1989, wie 97 supporters vaan Liverpool umkaome, brach heer 't leedsje es 'ne benefietsingle obbenuits oet. In 2020 deeg heer dat nog ins, noe es ierbetuin aon de zörgverlieners bij de COVID-19-pandemie.
Intösse waor d'n awwerdom zienen tol goon eise oonder de bandleie. Bassis Les Chadwick (dee nao de jaore zèsteg bij reünies neet mie mètgespäöld had) storf in 2019. Gerry zelf góng begin 2021 doed aon 'ne bloodvergifteging. Mèt Les Maguire storf in 2023 de lèste vaan de oersprunkeleke bezatting.