Flodder (tilleviesserie)

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Tegels. Laes hie wie v'r mit de versjillende saorte Limburgs ómgaon.


Flodder

Flodder is 'n mediafranchise die oet dreej films en ein serie van vief sezoene (62 aaflaeveringe) besjteit. De franchise is bedach door filmregisseur Dick Maas. 't Allewiel failliete filmbedrief First Floor Features haet de serie geproduceerd.

De tilleviesserie geit euver 'n asociaal femilie die zich in 't kader van 'n sociaal projèk maag vèstige in Zonnedael, ein van de sjiekste wieke van de fictief sjtad Amstelhaeghe. Hön woeëning zuut d'r oet wie ennen boewval, zeej kalle mèt e plat Amsterdams accent en zeej höbbe allemaol op ein of anger meneer te make gehad mèt de pliesie. Det leid dök tot confrontaties mit de sjnobistische buurtbewoeëners. In versjeie aaflaeveringe sjteit dit conflik centraal, ederskier mèt 'n anger thema. Me kint häör dös opvatte es 'n satire op de Nederlandse waalvaortssjtaot en de politieke korrèkheid. De naam "Flodder" zèlf haet 'n döbbel betaekenis. Hae verwies einerzieds nao de flodderige (sjlonzige) sjtaot van 't hoeshaje en angerzieds nao d'n tèrm losse flodder. Wie zoeëne losse flodder maak de femilie dök 'ne houp besjtakel, mer oetintelik is zeej eigelik allein asociaal en neet zoeëzier zjwaor crimineel, wie de luuj in de wiek dènke.

Productiehistorie[bewirk | brón bewèrke]

D'n tèrm kènt verwieze nao of de films of de vief sezoene. 't Begós mit de film Flodder, dae in 1986 woort geproduceerd en mier es 2,3 miljoen bezeukers trok.[1] In 1992 volgde 'ne twieëde, Flodder in Amerika!. Beide films waore zoeën groeët succes, det me nao aanleijing heejvan 'n serie maakde. De ierste dreej sezoene besjtónge oet 36 aaflaeveringe en woorte geproduceerd tösse 1993 en 1995. In det lètste jaor kwaam de film Flodder 3 oet. Sezoen veer en vief kwame oet in 1998.

Opnaamlocaties[bewirk | brón bewèrke]

De Ross van Lenneplaan op de Kolleberg, die es opnaamlocatie gedeend haet

De wiek Zonnedael is gebaseerd op de Zittertse villawiek Kolleberg. Heej woorte deile van de films opgenómme. De ierste opnames veur de film van 1986 woorte gemaak in e recreatiegebeed in 't Naord-Hollandse Spaarnwoude. De res woort veural opgenómme op de Kolleberg, sómmige ouch op 't Bels. Zoeë is 't sjtadhoes van 't fictief Amstelhaeghe eigelik det van de Brösselse veursjtad Sint-Gillis. De opnames veur de serie en de angere twieë films woorte gemaak op 't terrein van 't bedrief First Floor Features in Almere. De huzer besjtónge allein oet veur- en ziejgieëvels. De wiek waor op häör groeëtst in 1995; zeej besjtóng op det momènt oet twelf villa's.

Nao de opnames van 1997 woort de wiek nog ein kier gebroek es oefeterrein veur d'n brankwaer. First Floor Features had 't terrein in juni 1999 verlaote door financieel probleme.[2]

Hoof- en beejrolle[bewirk | brón bewèrke]

Hoofrolle[bewirk | brón bewèrke]

  • Ma Flodder (Nelly Frijda): De moder en hoesvrouw van de femilie. Dök loup zeej in e sjolkechtig kleid mèt bleumkesmotief en röbbere sjtevels. Zeej sjteuk gaer illegale whisky. Häör kinger zouwe van versjèllende relaties kómme.
  • Johnnie Flodder (Huub Stapel, Coen van Vrijberghe de Coningh): D'n aadste zoon van Ma Flodder. Zien blónde kouf, roeëj jack en sjtevels oet sjlangelaer make höm tot 'n opvallende versjiening. Hae is zier materialistisch ingesjteld en 'ne richtige charlatan. Doorgaans verdeent hae mèt klein crimineel kerweikes zien geld. Zienen auto, 'ne Chevrolet Caprice Classic oet 1973, is hèllig.
  • Zoon Kees Flodder (René van 't Hof, Stefan de Walle): D'n dómmen broor van Johnnie. Daoröm haet hae beejveurbeeld in taegesjtelling tot zienen broor gein succes in 't versere van vrouwe. Kerweikes veurt hae same mèt höm oet, wiewaal d'r döks juus door zien handele get sjeitert.
  • Dochter Kees Flodder (Tatjana Simić): De beeldsjoeën mer dóm dochter van Ma Flodder. Zeej leet gaer in of beej 't zjwumbad, haet eder waek 'ne nuje vrunk (dök 'ne gevieërlike crimineel). Zeej wuurt door Johnnie ouch gaer ingezat es chantagemiddel in conflikte mèt beejveurbeeld buurtbewoeëners of viejande.
  • Opa Flodder (Jan Willem Hees, Herman Passchier): 'ne Gepensioneerde mètwèrker van de NS. Hae zit ummer in 'ne rolsjtool en druueg ederen daag 'n uniform. Waarsjienlik behuurt hae neet tot de femilie. De Flodders höbbe e bietje minachting veur höm, wiewaal hae sóms sjlummer is es ze dènke.
  • Henkie en Toet Flodder (Horace Cohen, Melle de Boer, Sander Swart, Rogier van de Weerd en Nani Lehnhausen, Mandy Negerman, Scarlett Heuer, Djune-Ann van Asten): De 10-jaorige zoon en 11-jaorige dochter van Ma Flodder. Zeej zien batjakkers, wat bliek oet 't feit det zeej óngeoorloof sjoeël verzoume, klein criminaliteit plaege, ónverzörg rónkloupe en neet opgeveujd zien.
  • Jacques van Kooten (Lou Landré): Dökker Sjakie geneump. Hae is de sociaal wèrker van de gemeinte en fervent veursjtander van 't Flodder-projèk. De Flodders mage höm neet ech. Zeej make waal gaer gebroek van zien naïviteit.
  • Whisky (Boef van de Vianahoeve; Coen van Vrijberghe de Coningh, es sjtum in ein aaflaevering): D'n troewen hónk van de femilie. Hae hèlp häör, wiewaal hae neet begrepe wuurt. Dök vèlt hae posbodes aan.

Beejrolle[bewirk | brón bewèrke]

  • Hennie (Laus Steenbeeke): 'ne Kammeraod van Johnnie. Hae haet dök e kerweike voor höm. Meistal verdeent Johnnie dao good geld mei, wiewaal Hennie dök in de probleme wuurt gebrach door 't ónhendig optreije van de twieë breurs.
  • Kareltje (Miguel Stigter): Ennen angere kammeraod van Johnnie, dae mèt e Haags accent kalt. Ouch hae haet dök e kerweike veur höm, mer meistal is 't gaar neet betroewbaar.
  • Buurvrouw Neuteboom (Lettie Oosthoek): De naobervrouw van de femilie en vrouw van Ed neuteboom. Zeej sjteit dök achter de gordiene öm de femilie in de gate te haje en kènt behuurlik zeivere.
  • Buurman Neuteboom (Bert André): De naober van de femilie en man van Tilly Neuteboom. Hae haet gein groeëte meujte mèt de femilie, mer waal mèt 't meujlik karakter van zien vrouw. Sjtiekem haet hae 'n uigske op dochter Kees Flodder.
  • De wèthajer (Frans Kokshoorn, Jurg Molenaar, Edmond Classen): De mierdere van Van Kooten. Hae haet 'n minachting veur höm en wilt de femilie gaer zoeë sjnel wie meugelik waeg höbbe oet Zonnedael, zoeëdet de wiek weer e good aanzeen krieg.
  • Van Putten (Dick Scheffer, Hans van Hechten): D'n eigenaer van de SRV-wagel. Zonnedael haet gein eige inkoupcentrum, waodoor me veur de dagelikse baodsjappe afhankelik is van de klein supermert. 't Aanbod is aafgesjtump op de bewoeëners van de wiek.

Euverlieje Coen van Vrijberghe de Coningh[bewirk | brón bewèrke]

Hoofrolsjpeuler Coen van Vrijberghe de Coningh euverleej aan 'nen hertsjtilsjtank tiedes e Flodder-sketch in beejzien van de acteurs Tatjana Simić en Stefan de Walle. Koum dreej daag d'rveur waore de lètste opnames veur 't viefde sezoen.[3] Dees aaflaeveringe woorte vanaaf jannewarie 1998 postuum oetgezónge mèt toesjtömming van de naobesjtaonde.

Trivia[bewirk | brón bewèrke]

  • In de twieë ierste films sjpeulde d'n Tegelsen acteur Huub Stapel es Johnnie Flodder.
  • Tiedes vastelaovend 2018 maakde 'n vastelaovesvereiniging oet 't Naord-Limburgse Brokeze 'n parodie op de origineel serie in 't lokaal plat.[4] 't Filmke trok zèlfs de aandach van de maker.[5]

Brónne[bewirk | brón bewèrke]

Dit artikel baseert zich gedeiltelik op 't corresponderend Nederlandstalig artikel, en waal in dees versie [1].

  1. Flodder.tv - FLODDER (1986)
  2. Eye film instituut nederland - 110 FIRST FLOOR FEATURES (archivalia 1985-2003)
  3. De Volkskrant - Coen van Vrijberghe de Coningh, acteur, plotseling overleden
  4. YouTube - YouTube - FLODDER IN BROKEZE CARNAVALSFILM
  5. De Limburger - Dick Maas prijst Noord-Limburgse Flodder-parodie