Eugenius Bossilkov
Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.
Eugenius Levidzjov Bossilkov, CP (geboare es Vincent Bossilkov, * Belene, 16 november 1900 – † Sofia, 11 november 1952) woar 'ne Bulgaarse katholieke prelaat deë va 1947 bis zing executie in 1952 bussjop woar va Nicopolis. Heë woar lid van de Passioniste.
Bossilkov ging i Rome vuur zie doctoraat aan 't Pauselik Oriëntaals Instituut en woar parochiepreester i g'ne Donauvallei. Es bussjop woar heë i 1952 durch 't communistische regime gearresteerd, same mit vöal anger religieus leijers, woenoa heë woeëd geëxecuteerd vuur zoeëgehete sjtaatsmisdade. In 1998 woeëd heë zieëlig verkloard durch Paus Johannes Paulus II.
Leëve
[bewirk | brón bewèrke]Vincent Bossilkov woar geboare óp d'r 16e november 1900 in 'n familie van etnisch Bulgaarse katholieke van de Latiense ritus in Belene, Bulgarije. Wie heë veertieën joare aod woar, troan heë in bei de congregatie van de Passioniste. De Passioniste zint 'n Italiaanse religieus orde die ópgerich is durch Sint Paulus van 't Kruuts in de 18e ieëw. Ze zint seër 1781 actief in Bulgarieje. Bossilkov sjtudeerde in Passionistehoezer i Nederland en óp 't Belsj. Heë noom d'r religieuze naam Eugenius aa. In 1920 doeg heë zing gelofte en i 1926 woeëd heë tot preester gewieëd.
In 1924 ging heë truuk noa Bulgarieje um theologie te studere. I 1927 ging heë noa Rome vuur zie doctoraat te hoale aan 't Pauselik Oriëntaals Instituut, woe heë e proefsjrif sjreef uuever de Unie van Bulgare mit d'r Hillige Sjtool in 't begin van de 13e ieëw. Truuk in Bulgarieje houw heë diverse functies in 't busjdóm, meh heë houw de vuurkeur um mit de leke te werke. Heer waor parochiepreester i g'ne Donauvallei, woe heë bekind sjtóng es gelieërde en vuur zie werk mit jongere in zing parochie.
Noa d'r Twieëde Weltkreeg veel de Sovjet-Unie 't Keuninkriek Bulgarieje binne en installeerde e communistisch bewind. Dit bewind probeerde alle religieus institute en gleuve te verdrieve. In dizze tied woeëd Bossilkov i 1947 benumd tot bussjop va Nicopolis. Vanaaf 1949 versjlechterde de situatie vuur religieus institute. In dat joar woeëd d'r apostolische nuntius oet 't lank gezat, noom 't regime egedomme van de Katholieke Kerk in bezit en óngerdrukde religieus congregaties. I 1952 begós 't regime massaal kerkelike functionarisse te arrestere. Óp d'r 16e juli woeëd Bossilkov durch de pliese gearresteerd in Sofia.
Gevangesjap en proces
[bewirk | brón bewèrke]Bossilkov woeëd zoeëwaal fysiek es mentaal gemarteld i g'n gevangenis en gedwonge um bekentenis aaf te legke dat heë d'r leider zouw zieë van 'n katholieke samezjwering teëge 't communisme. Tiedes e showproces zint twieë pistole in besjlaag genoame van e katholiek college in Sofia, wat es bewies gebroek woeëd teëge Bossilkov. Dees pistole woare evvel óngerdeel van 'n museumcollectie. Bossilkov woeëd sjuldig bevónge:
"Op grónk van artikele 70 en 83 van 't sjtroafwetbook veroerdeelt 't Hof de besjuldigde, Eugenius Bossilkov, tot de doeëdsjtroaf durch e vuurpeloton, en weëde al zing bezittinge in besjlaag genoame... Dr. Eugenius Bossilkov, katholieke bussjop, hat zing religieus sjtudie in Italië aafgerónk en woar durch 't Vaticaan ópgeleid vuur contrarevolutionair activiteite en spionage. Heë is inne van de leiders van 'n clandestien katholieke organisatie. Heë hat kontak gehad mit diplomate oet imperialistische leng en goof hun vertroewelike informatie. D'r besjuldigde hat 'ne diocesane road beigenee gerope woe-i woeëd besjloate 't communisme te besjtreie via religieus conferenties, zoeëgenaamde 'missies' gehaote in Bulgarieje. Teëge dit vonnis is gee beroep meugelig."
Bossilkov woeëd óp d'r avond van d'r 11e november 1952 um 23:30 oer geëxecuteerd durch e vuurpeloton óp 't terrein van de gevangenis. Zie lichaam woar in e massagraaf gegooid en neet truukgevónge. Paus Pius XII hat Bossilkovs marteleërsjap genumd in zing encycliek "Orientales Ecclesias" i 1952. Pas i 1975 woeëd bevestig dat d'r bussjop woar gesjtórve, wie 'ne Bulgaarse minister 't Vaticaan bezoch en direk durch Paus Paulus VI woeëd gevroag noa 't lot van Bossilkov.
Zieëligverkloaring
[bewirk | brón bewèrke]In tachetiger joare woeëd bewies verzameld uuever 't leëve en d'r doeëd van Bossilkov, dat vuurgelag woeëd aan de Congregatie vuur de Hillig- en Zieëligsjpreëkingsprocesse i Rome. I 1993 en 1994 verkloarde de congregatie zich positief uuever de zaak van Bossilkov es katholiek marteleër. Óp d'r 15e meëts 1998 verkloare Paus Johannes Paulus II um zieëlig.
In 2010 woeëd Eugenius Bossilkov durch 't Bulgaars parlement gerehabiliteerd.