Duusbörg

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Oetziech vaanoet 't zuie op de binnestad vaan Duusbörg en häör noordelek gelege industrie

Duusbörg (Hoegduits Duisburg [ˈdyːsbʊɐ̯k], Nederlands ['døysbʏrx]) is 'n krinkvrij stad in Noordrijn-Wesfale, 't distrik Dusseldörp, aon de moond vaan de Roer in de Rijn. De stad heet e laank verleie es handelsplaots, meh oontwikkelde ziech vaanaof de negentienden iew bezunder sterk es industriestad. Door zien ligking aon de poort vaan 't Roergebeed is Duusbörg de groetste binnehave vaan de wereld. De otochtoon bevolking sprik vaanajds 'n euvergaanksdialek tösse Kleverlands en Limbörgs (Düsbergsch Platt); allewijl spreke de mieste lui, veur zoewied ze neet Hoogduits praote, Roerduutsj.

De Rienlandse stad ligk op dreiëndaarteg meter hoegte, is 232,8 veerkante kilometer groet en had in 2025 502.270 inwoeners. Daomèt goof 't 'n bevolkingsdiechte vaan 2158 inwoeners de veerkante kilometer. Door de deïndustrialisering die vaanaof de late zeveteger jaore begos, heet de stad noets mie 't bevolkingsaontal vaan 1976 genote - wie 't 600.000 inwoeners goof in de stad. De stad heet sinds miert 2026 'n gemeinteraodscoalitie vaan de SPD (34 vaan de 104 zedele), CDU (18) en Jungus Duisburg (4).